Rimusciu spurtivu... di Ghjacumu Fusina
Hè schjattata una bomba in u mezu à spessu agitatu di u pallò eurupeu : l’annunziu sprupusitatu d’una lega nova d’une poche di squatre scelte, da fà cuncurrenza à e cumpetizioni esistenti.
U mutivu principale pare quellu di e rendite assai più alte pè quelli ch’aderisceranu, senza primura nisuna di ciò ch’ellu pò riprisentà d’altronde issu ghjocu pè i milioni di spetatori chì seguitanu cun passione tutte isse cumpetizioni.
Quelli chì s’interessanu à issu sportu anu fattu sapè ch’ella saria una manera di cundannà ciò ch’elli portanu d’incertu i risultati, u vince è u perde, u piacè di vedesi misurà squatre sfarenti assai, senza parlà di tutta l’urganizazione di i scontri, di a furmazione di e squatre è di l’omi, di l’amparera di u ghjocu, è ancu di u piacè d’un spetaculu populare chì, malgradu e so imperfezzioni, hè una parte impurtante di u passatempu di tanta ghjente. Manifestazioni è pruteste in parechji lochi è ancu demissioni di certi di i primi di l’affissu anu forse purtatu qualchì risultatu, ma nunda ùn hè ancu sicuru pè a seguita.
Invece, noi altri chì c’interessemu dinù à i risultati più mudesti di e squatre isulane di pallò, ci ralegremu di vede per indettu a strada bella ch’ella face quella turchina di Bastia pronta à vultà tanti anni dopu in a cumpetizione prufeziunale di segonda divisione. Un serà tantu affare, ma sò mumenti chì cummovenu è chì currispondenu à un piacè di u ghjocu publicu, chì hè una realità suciale dinù ellu.
Ghjacumu Fusina