Strategie... di Ghjacumu Fusina
Sò in l’obligu di scrive torna nant’à listessu sugettu chì l’affari cambianu pocu da una settimana à l’altra. Vi dicia cù l’ottimisimu d’una certa speranza ch’elli anderianu forse megliu l’affari nustrali, ma vecu ch’ella ùn si passa ancu cusì in incanti a lotta medicale in casa nostra.
U guvernu ci avia fattu cunnosce a so strategia di tene contu di e capacitai di l’ospidali di riceve maladi di a pandemia, pè decide e misure adatte in fatti di lotta, volesi dì cuntrolli è verifiche, è dopu vaccinazione. Senza lentà mai i gesti cutidiani di prutezzione è fendu pisà nant’à ogni dipartimentu a minaccia di coprifocu è forse torna cunfinera. Hè ciò chì spiega l’ultime misure generali secondu i lochi più culpiti.
Iè ma per ch’ellu si passessi tuttu cusì ci vulia forse à anticipà a pratica di u terrenu, appruntà i lochi di l’operazioni, i persunali adatti, a scelta è a quantità di e dose da iniettà à tuttognunu. Invece i rispunsevuli a s’anu pigliata cun asgiu è tempu è appettu à ciò ch’elli anu fattu altri, u paragone ùn era tantu gluriosu. Ci hè vulsutu a reazzione di certi eletti o medichi, è ancu quella di tanta ghjente chì rimpruveravanu a lentaghjine di u guvernu.
Allora s’hè decisu d’andà più prestu, perdesi in centu passi amministrativi, principiandu cù i stabilimenti di vechji, è dopu i persunali di a salute è i pumpieri…via sempre cù prumesse è poca realità di terrenu. Face chì simu e millaie à esse vulintariosi è pronti senza ch’elli ci pruponghinu ancu nunda di cuncretu. Chè no fussimu giovani o vechji, cumu esse suddesfi di quessa a situazione ?
Ghjacumu Fusina