Replay du dimanche 21 février 2021

L'horoch'ti de ce dimanche

Bon diminche mes gins !

José Ambre
José Ambre © Radio France

BELIER, et’ famill’ alle arot rêvé d’un diminche fin bénache, mais te vas n’in faire qu’ à t’ tiête et ruer des quate fers…tant pis pour euss’,… ed’ toute manière quand qu’ t’es parti, y-a rin qui peut t’ arrêter, ti… !

TAUREAU,  ch’ t’ eune jornée toute douche qui t’ attind…calme, trinquille, et pour joinde l’ utile à l’ agréape, une tape bien garnie et bien arrosée…. T’ as juss’ à t’ laicher porter… !

GEMEAUX, t’as bin du mau à t’ armett’ de t’ sémaine ti,… i faut dire equ’ t’as point arrêté eune minute non pus… mais bon, profites quand même ed’ tin diminche, cha n’arrif’ qu’eune fos tous les 7 jours …!

CANCER, té vas t’ artreuver un monet coinché au mitan de t’ famill’, ti… et pourtant,  aujord’hui, t’as invie d’ faire voler tin dragon… bon, bin, té peux toudis essayer… te verras bin c’mmint qu’ tes gins i l’ print’tent …!

LION, y-a des jours comm’ cha où tout i tourne au vinaique… t’as biau faire, y-a rin qui va… l’miux qu’ t’as à faire,  ch’ est d’ boère eune bonne pinte et attinde equ’ cha passe,… ed’ toute manière, t’y cang’ras rin … Intre nous, pour el’ pinte, te fais cha aveuc modération quand même hein …!

VIERCHE, t’ organises tout comm’ si qu’ t’avos un ordinateur dins l’ vinte, ti … mais bon… ho… hé… ch’est diminche hein… !  Mets ch’ l’ écran in veille,  ch’ disque dur ed’ côté, rinte tin mulot dins s’ gayolle et profites un monet d’ la vie cré nom des os …!

BALANCHE, te n’as par déssus t’ t’tiête ed’ tout chou qu’ t’as à faire à t’ mason et t’arros plus querre d’ aller galvauder… mais bon, tout chou qui-est fait i s’ra pus à faire, t’arras l’temps après…!

SCORPION, si qu’ t’es célibataire, y-a qu’ les z’amours qui t’ interrés’tent… mais bon, n’ perds point tin temps, déclares-te tout d’ sute, et cha va querre tout seul …!

Aujord’hui, SAGITTAIRE, te t’in sortes fort fort bien et t’ jornée alle va t’ête bin agréape … profites z’in, pass’que  y-a eune rude sémaine qui t’ attind …!

CAPRICORNE, t’es in route à  mett’ tes comptes à jour, et t’armontes les bertelles à tes gins vu qu’ té treuves qu’i dépins’tent à tort et à travers….hé, ho, et  ti,… jamais te fais d’ excès pét’ête ?

VERSEAU,  t’as du mau à t’ armett’ d’eune déception et y-a eune banse ed’ nuages noèrs qui tournicott’tent au d’sus de t’ tiête…, fais l’ gros dos et mets’te au rasdos… après l’ pleuf’ el’ biau temps… !

Et infin, PICHON …   v’là t’i pos qu’i t’ prind l’ invie ed’ tout nettier, ed’ tout ringer et pis toute et pis toute… cha t’ prind point souvint ti, mais quand cha t’ prind, vaut miux garrer ses puches, pass’que cha déménache hein …

Allez, à d’main mes gins et bon diminche…

Mots clés: