L'horoch'ti de ce dimanche 28 mars

Ch’ t’ eune fort bonne jornée pour ti, BELIER…Te vas n’in profiter pour faire tout chou qu’ t’as invie d’ faire…. N’ in fais point d’ trop quand même, hein, gardes z’in un peu pou’ l’ mos qui vient… !

Ha, TAUREAU, te pinsos t’ête au bout ed’ tes dépinses, et ben bernique… i n’y-a cor quèqu’ factures à vénir… non mais… te n’ pinsos quand même point t’in sortir à si bon compte, non …?

GEMEAUX, té vas avoèr bin du mau à t’ sortir ed’ tin… stress’ comm’ i dit’tent à ch’ t’heure.. mais tes commarat’s i vont t’ aider… même si i n’ sait’tent point vraimint chou cha n’es qu’ le stress …!

CANCER, t’es amoureux mais te n’es point prêt à faire tout chou qu’i faut pou’ qu’ cha vache… te veux tout prinde mais sins rien donner… Mais bon, cha pourra jomais aller comm’ cha, min loute… !

LION, t’es tell’mint mat equ’ te n’as même pus invie d’ cacher l’ avinture… et pourtant l’ avinture, cha t’ connos,… cha t’mène pa’ l’ bout du nez d’ pus qu’ t’es né…. A m’ n’avis qu’ t’es vraimint mat, min tiot… !

VIERCHE, cha continue à aller d’ miux in miux, mais te vas t’ête contrariée par eune tiote affaire equ’ t’avos point prévu…allez, n’ gâches point tin week-en aveuc des broutill’,  te verras cha d’main !

BALANCHE, si qu’ t’es acoquiné aveuc quiqu’un, te vas profiter de ch’ week-en-chi pour faire un tiot apparté juss’ à deux… pour el’ z’autes, circulez y-a rin à vire …!

SCORPION, ch’ cat i-est dins ch’  l’ horloche, mais te vas t’ réconcilier sous ch’ t’ édredon… Espérons qu’ va durer… Mais pour cha, i faudra pét’ête invisager ed’ tuer ch’ cat …!

SAGITTAIRE, et’ tiête alle est imbardouillée d’ imbroulles equ te n’ arrif’ point à détouiller… bos un coup, respires du vinte, oblies tout cha et  profites ed’ tin week-en…d’main t’i verras pus clair…!

CAPRICORNE, t’es toudis in route à miler à ch’ treu, à l’ affut d’eune bonne affaire à faire… mais bon, …y-a affaire et affaire hein … conji les bonnes et laiches el’ z’autes pour chés babaches…!

VERSEAU, si qu’ te fais el’ décompte ed’ tes sous, te vas drisser dins tes maronnes comarat’… va falloèr saquer d’dins pour armett’ tin compte à flot…habile…cha presse …!

Et pour finir, PICHON, y-a quiqu’un qui t’as laiché querre et cha t’ fais broyer du noèr… allez, armets’te m’tiote crotte… un d’ pardu et diche d’ artreuvés   incore faut-t’i assurer, pass’que  dich’ à l’ fos, faut eune rude sinté …