L'horoch'ti de ce vendredi 29 octobre

BELIER, te pourros bin faire eune rinconte amicale et sincère…Bonne nouvelle non ?... un véritape ami, ch’ est toudis bon à printe …!   

Si qu’ te sais y faire, TAUREAU, te vas arriver à tes fins…Et j’ me fais point d’ bile pour ti… J’ te connos… ch’ ti qui va te l’ infuter i-est point cor né… !   

« A cœurs vaillants rien d’impossible » GEMEAUX… Incore faut t’i avoèr l’ allant qu’i faut… et cha, te l’as point vraimint in ch’ momint… alorss, gardes cha dins t’ besace, té l’ arsortiras quand qu’ cha ira miux … !

CANCER, i n’ a qui dit’tent equ’ te n’ in fais d’ trop, et d’autes pas assez…A t’ plache, ej’ les inverros mett’ lus pindulles à l’ heure… à vire qu’ alles z’in ont grand bézon … !   

En’ t’ énerf’ point min tiot LION…Cha sert à rin d’ grimper aux rideaux, te risques in plus eune mauvaiss’ chutte… suis ch’ mouv’mint et laiches faire el’ temps… ch’est li qui décidra pour ti…!  

T’ arprinds l’ déssus VIERCHE, et cha n’ est point plus mal… soé pachient, et te verras qu’ cha ira incore miux aujord’hui… acoutes mon onque José, i-est toudis d’ bon consel’ …!   

T’ as bézon qu’ in s’ occupe ed’ ti BALANCHE… ?   Ben  t’ as juss’ qu’à l’ deminder pis cha va s’ faire … Incore faut-t’i equ’ te daignes el’ deminder, et cha, ch’ est eune aute affaire…!   

T’ as fais eune grosse boulette SCORPION…Heureus’mint qu’ t’as quèqu’ bons comarat’s qui vont rattraper ch’ coup, sinon, t’ étos dins un rude brin … !   

In attindant qu’ la chance alle arvienche SAGITTAIRE, ravises bin ed’ dù qu’ té mets tes pieds, cha t’ évit’ras d’ marcher dins des affaires qui n’sint’tent point la rose, te vos chou que j’ veux dire … ?   

In n’ te fait plus confiance CAPRICORNE, et i va falloèr attinde in momint avant qu’ cha n’ar’vienche …In attinadant, ringes et’ mauvais’ humeur et fais bonne figure, cha t’ cang’ra …!   

Dins la série : « y-a rin qui passe sins qu’ cha rapasse », VERSEAU, tout i c’mminche à r’vénir au biau pour ti… bon, ben, vaut miux comm’ cha hein,  pass’que d’pus un momint te n’ a vu des drôles …!     

Et pour finir, ti, PICHON, te n’ es point mal plaché… ech’ 2 ème quartier d’ Leune, fort ben arloyé à tin signe, i va t’ profiter à mervelles et cha va t’ permette d’ arriver à bout ed’ tout chou qui   t’ ténot à cœur…