Donibane Garaziko Garatenia trinketean, pilota pariatzaileak

Astelehen arratsalde erditsutan, jende ainitz metatzen da Garateniako sartzean : pilotazaleek ez dute eguneko partida huts eginen !
Denak sartzen dira pilotaren "tenpluan", eta usaiako lekuan jartzen dira, lehen edo bigarren galerian.

Lehen galerian, trinketaren zolan, txapela buruan, pilotazale talde bat aste guziz elkartzen da : pariatzaileak dira.
Hoiek aspaldiko ohitura atxikitzen dute : pilotarien gain pariatzen dute, berdeak edo gorriak hautatuz.
Elkarren artean mintzatzen dira, eta parioak egiten : partida denboran, kasik bukaera arte, parioak biziarazten dituzte.
Azken kintzea markatzen delarik, sosa sakela batetik besterat pasatzen da. 

Parioak gehienbat Donibane Garazin egiten dira, bainan batzutan, pariatzaileak beste trinket batzuetarat joaiten dira.

Frantzian, dirua pariatzea debekatua da, bainan "tolerantzia" bada, ohiturazko parioak direlarik, "kulturalak" direla estimatzen baita.