"Marig Ar Pollanton" gant Jacqueline Cornec ha Gaëlle Trébaol

Roet 'vo deoch da glevet hiziv ur ganaouenn hengounel deuet brudet e 1970 gant Alan Stivell, desket gantañ e Sant Herbot e Plonevez ar Faou (29) e kerzh ur fest-noz tro-dro bloavezh 1963.

"Marig Ar Pollanton" a gont istor ur vaouez yaouank o c'hortoz ken na zeuio en-dro he dousig eus e goñje. Partiet eo ar paotr evit ober manoeuvre e Kemper ha war dachenn ar brezel bras (1914-1918).

Savet oa bet "Marig Ar Pollanton" e Tregarvan (29) diwar istor gwir ur vaouez 'veze graet Mari Kefeleg anezhi hag a oa ganet e Argol e gourenez Kraozon (1880-1925). Ar sonen 'oa bet krouet da gentañ evit ober goap anezhi. Dimezet 'oa-he d'ul labourer douar a-benn ar fin.

Met ken fromus eo deuet da vezañ an istor-se gant Jacqueline Cornec ha Gaëlle Trébaol ! Un istor a garantez hag a basiañs. Eus Plougernevel (22) eo Jacqueline e-kichen Rostren, he zad a sone akordeoñs, treujenn-gaol hag he zud a gane mat e galleg. E Brest eo bet ganet Gaëlle, bet maget e Logonna-Daoulaz (29) ha deuet en-dro e Breizh e Menez Are goude bezañ chomet 30 vloaz e bro Ganada. Kan a ra asambles gant Jacqueline dibaoe pemp bloaz.