Attenti à a Donna Bianca

Émission 

Attenti à a Donna Bianca

Facebook ! A sapete, Facebook…. Ùn simu tutti nant’à Facebook, duv’è noi cuntemu a nostra vita, mettimu e nostre fottò, cunniscimu i particulari di l’intimità di a moglia di Ghjuvanpaulu Luciani, sapemu  tuttu ciò ciò ch’ella hà in capu Rislaine, a mio amica di Rabat, è ancu induv’ella hè.  Voi è eo, avemu accunsentutu ch’ella ci sia nigata a minima pussibbilità di vita privata, da ch’avemu cumpru u nostru primu Smartphone.

Sappianu puru tuttu di mè ! Dò u permessu à a pulizza, à a gendarmeria, à Manuel Valls, à e Guardie Sguizzere, à u Priuratu di Sion, à Bioman Rouge, à l’abitanti di a Terra di Mezzu, à Fox Mulder è Dana Scully,  à l’abitanti di l’Isula Smarrita, à l’extraterrestri di Medvedev chì pupuleghjanu a terra, à Bernard è Bianca, à Mickey Mouse, à Pluto, à i Mazzeri, à i Signadori, à i Carbunari, à Matrix, à i Texas Rangers, à i Massoni, à l’Illuminati, è ancu à i cruciati di a sterpa di u corciu di Godefroy de Bouillon, di leghje e cunnerie chì Ghjuvanpaulu Luciani è eo è voi, publichemu nant’à Facebook.  

A sò, hè finita a mio vita privata, ancu quand’eo vò in cabinettu, u KGb di Facebook a sà induv’eo sò. Peghju, ùn sò più patrone di mè stessu : l’aghju datu a pruprietà di tuttu ciò ch‘eo scrivu, pensu o aghju l’intenzione di fà. Passendu, porgu un caru salutu à i servizii secreti è à a pulizza pustale chì leghjenu ciò ch’eo scrivu, ripuliscenu u mio ordinatore, staccianu e mio cunnessioni è curregenu i moi sbagli di gramatica sottu à l’autorità di Ghjuvannu Chjorboli, ma chì mai mai ùn mi nettanu u cabinettu, partendu.

A sò, a vi tornu à dì, simu tutti sviliti è sottumessi. In issu sistema chì ci riduce à furmicula nant’una telatica infinita, hè più siguru d’andà in galera un blogger chè un puliticu currottu.

Allora, tagliemulila à l’accorta. Dimulila : iè, simu stati noi. A colpa di a morte di Marylin, di u crollu di e Twin Towers, di u riscallamentu di u mare è di a cunsunatura capunenzu,  l’avemu noi. Palisate, palisate tutti, o a Donna Bianca venerà pigliavvi ista notte. O l’Omu Neru.

 

Partager sur :