Bleu Limoges

Émission 

Schisate à Limoges !!

Patrick Rossi hè vultatu da Limoges.  Tuttu bleu.

Site digià rivenutu da Limoges, voi ? Mai ? Allora ùn pudete sapè ciò ch’ella hè.

Digià ci vole à andà. Vi ci vole à truvà una ragiò d’andà à Limoges. Ùn vecu micca ciò chì vi puderevvi purtà à Limoges, quessa ùn mi dumandate, ùn vecu micca. Noi, incù e Surelle Vasetti, viaghjemu assai, a sapete : Mungulia, Buthan,Tanganikà, u Niolu, ma l’idea d’andà à Limoges, mai mai ùn ci serebbi venuta. Aghju asgiu à circà, ùn vecu micca, ùn vecu micca ciò chì Patrick Rossi ghjè andatu à fà à Limoge. Patrick Rossi !.. Alò, u figliolu di Paul sè voi vulete.

Ghjè un misteru. Quand’ellu hè partutu, m’avia l’aria nurmale : biancu è rossu, chjarasginu. Ridia per nunda, cum’è d’abbitutine. À u vultà ghjera bleu. Bleu. Bleu, ghjè une parulla ch’ùn si dice chè in Francese, avete rimarcatu ? U bleu in Corsu ùn esiste. Ci hè u turchinu, hè vera, ma turchinu ùn hè bleu. Ci hè u celestu, u marinu, l’oltremarinu. Ma bleu ùn avemu. Bleu, ci vole à dilla in Francese, ghjè una parulla nova, in Corsica bleu ùn ci n’hè. Avà tutti dicenu turchinu, turchinu, turchinu, anu a bocca piena di turchinu. U turchinu, ghjè un marinu chì tende versu u verde. Ùn hè micca bleu. È bè, Patrick Rossi ùn era micca turchinu, era bleu, vultendu da Limoges. Micca u bleu di e ceramiche di Limoges chì rapresentanu isse campagne malinconiche tutte bleu : l’erba bleu, a ghjente bleu, e casi bleu, un cane chì corre, bleu. U bleu lavatu è tristu di i decori nantu à i piatti in purcellana di Limoges. Innò, patrick Rossi ghjera bleu bleu bleu. Di issu bleu specificu chì vi culurisce a pelle quand’è vo rivenite da Limoges : u bleu santavugliu.

Mi sò mezu chè impenseritu. L’aghju dumandatu : « cosa ai ?  Sì tuttu bleu è ùn ridi più ». Mi face, capipisatu, l’ochji aperti fissi fissi, parlendu d’un tonu inespressivu, à pena s’ellu riminava e labbre, cum’è unu ch’hè statu liscivatu da una paura inderna, un terrore : « rivengu da Limoges ».

A sò, voi avà pensate : « chì sà ciò ch’ellu hà vistu quallà, Patrick (u figliolu di Paul, alò), perch’ellu ne volti culor’ di Schtroumpf. »

U fattu stà, chì avà, Patrick, ghjè bleu - Stroumpf,  in un paese duve a ghjente hè turchina.

Partager sur :