Masa: Alsazia è Corsica

Émission 

I discorsi di u Presidente di a regione Alsazia...

Interessante, u discorsu di u Presidente di u Cunsigliu Regiunale d’Alsazia dumenica à Cuntrastu. Si ne pò ragiunà, senza fughje in a risata permanente, a macagna sempre rinascente o a ricerca nevrotica di l’estru comicu.  Dicu quessa perchè chì, per parechji, a ciarla, l’umurismu cutidianu, sò segnu di una fughjita pettu à a realità. Si riderebbi per chjode l’ochji. Ognunu cunnosce u dettu : a risa hè in bocca à i scemi.

Ùn hè sempre cusì. L’estru umuristicu, di siguru senza ghjudicamentu di valore nant’à a so pertinenza, pò esse ancu, mi pare, a ricerca d’un modu di cumunicazione efficace, una metafura estrosa, cum’una valisgia : l’impurtante hè ciò chì ci hè dentru.

Ma si pò ancu dà chì a valisgia sia viota.

Ghjè u casu oghje. Ùn vecu micca, un vecu micca ciò ch’eo vi puderebbi dì chì tratti in bisbò  -ridoni-, u discorsu di u Presidente di u Cunsigliu Regiunale d’Alsazia, dumenica à Cuntrastu. Mancu chì a valisgia sia viota, hè ch’ùn aghju micca valisgia. Allora parlemune, senza estru.

Interessante, quand’ellu si sugerisce chì, s’elli votanu di sì à u Riferendu, cum’elli a indettanu i sundaggi,  l’Alsazioni riesceranu a riforma di e Cullettività Territuriali, chì noi emu fiascatu in u 2003. Vale à dì a fusione trà Cunsigliu Regiunale è Cunsigli Generali. È ancu, in Corsica, ùn si duverebbi mancu arrestà à quessa. Cosa femu di e trecentusessanta cumune chè n’avemu ? Un percentuale altu, in u mondu paisanu, anu da zeru à vinti abitanti : a suluzione ùn hè mancu più a Cumunità di Cumune. Si tratta d’una necessaria fusione cumunale in certi lochi. U nostru bisognu di riforma hè ancu più forte. Ma piu difficiule.

A grande differenza trà Alsazia è Corsica, ghjè a dimensione pulitica. Per elli, u prugettu s’arresta à a Riforma Territuriale incù a messa in opera d’un bislinguisimu veru trà Tedescu è Francese. Quì, l’orizonte hè l’autunumia è a coofficialtà Corsu-Francese. Grande diversità pulitica. Elli, anu l’ochju aperti nant’à i benefizii ch’areca a vicinenza ecunomica è culturale incù l’Alemagna, senza u minimu brusgiulu di vuluntà di diventà Alemani. Noi, emu l’ochji mezu chjosi, o solu mezu aperti, nant’à e nostre e vicinenza, a Tuscana è a Sardegna, tant’elli sò sempre forti l’effetti negativi di l’iredentismu.

S’o ci liberessimu di isse pastoghje….

Masai 12 03 13 Presidente Alsazia

Partager sur :