Masai: Apertura di a caccia in Cugnoli-l'Appicciu

Émission 

Ci eramu in veru...

Mì, chì m’era scurdatu di cuntavvi l’apertura di a caccia à u cignale… Simu andati ch’eramu invitati trà Ghjuvanpaulu Luciani è eo. In a sucietà di caccia di Cugnoli-l’Appicciu, amici n’avemu parechji. Ci emu purtatu à pressu e moglie à l’apertura di a caccia à u cignale. Per elle ghjera le grand frisson. Eranu cuntente….

Tantu Ghjuvanpaulu chè eo, mai in vita nostra eramu andati à caccia. Ùn simu per nunda cacciadori, à dilla franca ùn ci appassiuneghja. Eramu incuriusiti è à tempu attirati da a virile amicizia chì regna in una squatra di cacciadori in caccia. Attirati ancu da u spuntinu in campagna chì sevuta. 

Infine chì, ci duviamu truvà à l’imbrancamentu di Sainte Lucie di Cugnola à trè ore di mane. Disgraziati, trè ore di mane… Ma i dui Toionò incù e su rutuloni sò stati puntuali.

Da u primu ghjuntu, s’hè varcatu malamente Ghjuvanpaulu : avia una beretta maruniccia à quatretti, generu Jack l’Eventreur, Scotland Yard. À l’inglese, alò. U so vestone di villutu pisava quant’à mè cinquanta chilò, li ghjunghjia à e dinochje. Ma ùn la ci facia à copre i so pantaloni di zuavu blanc cassés, gonfii gonfii cum’è mungulfiere, inseriti in calze di lana rosse chì li cullavanu à meze schinche. Per viaghjà asgiatu in i chjassi, avia calzatu un paghju di Mike novi. Bianchi. In punta d’una liaglia di coghju, ci era u cane pechinese neru di Karen. Arrabiatu cum’un scemu, era tuttu in abbaghjimi stressati. In traccolla à a spalla, s’avia infilatu l’anticu fucile orezzincu à tromba di u so caccaru.

Eo, era piattu in u segondu Toionò, incu e so rutuloni sempre calle. Aspettava prime d’esce.  Mi vulia rende contu di l’accolta chì l’amici cacciadori Cugnulesi, facianu à Ghjuvanpaulu, vestutu cum’è unu chì s’era sbagliatu di filmu. Aspettava chì, ancu eo, m’accurghjia ch’avia una tenuta cusì cusì. Hè stata spuntanea a reazzione : tutti, tantu i cugnulati chè i Cugnulesi, si sò messi à sciaccamanà quand’ellu hè falatu faticosamente da u marciapede di u pick up. Pensate, tamantu pesu nant’à e spalle. È u canucciu chì tirava a liaglia abbaghjendu, scimitu da una rabbia inutile, chì criscia incù i scaccamani smaravigliati di a Sucietà di Caccia à u Cignale di Cugnoli-l’Appicciu.

Ci vulia ch’eo mi varche dinù eo, ùn ci era Cristu à fà.

Hm!.. Aiò, mi varcheraghju dumane….

 

 

Masai luni 18 04

Partager sur :