Masai: Apertura di a caccia in Cugnoli-l'Appicciu, parte 2

Émission 

Ma issa partita di caccia in Cugnoli-l’Appicciu, incù Ghjuvanpaulu Luciani, ùn hè ? Ghjè a sevuta d’eri

Dunque, Ghjuvanpaulu era vestutu cum’è Jack l’Eventreur è ghjè affaccatu incù u pechinese arrabbiatu di Karen (a so moglia), à l’appuntamentu di trè ore di mane à l’imbrancamentu di Cugnoli. Eo, ghjuntu à pene dopu, per vestemi, m’era messu, pè a classa, a beretta bianca di marinaru di Eddie Barclay è un impermeabbile cum’è quellu diColombò. Era strintu in vita (« in vita » vale dì « à a taglia ), da a cartucciera di mitragliosa ch’ellu m’avia datu Sciarlu Battesti, vultatu da a Campagna di Madagascar. E palle ficcate in i so stucci, un pocu rughjinose, eranu tamante à merguez. Andate chì, sicuramente, i malgasci si ne ricordanu di Sciarlu Battesti. A mo manu manca era prutetta da un guantu di lana triccutatu da a mo surella. Vene à dì chì, cum’è tuttu ciò ch’ella face, ùn era micca finitu. E mo dite surtianu ar’ di fora.

Ancu eo cumè Ghjuvanpaulu avia una liaglia in manu.  Ma in cima, ùn ci era micca un cane pechinese,  ma a mo moglia, a signora Mimì, cum’elli a chjamanu à u Puntettu. L’avia macchigliata in cursinu -cum’avia pussutu -, chì cane di caccia un avia… Trà Ghjuvanpaulu è eo, ci simu salutati guardenduci un pocu freddi, è emu sevutatu a cumpagnia sin’à u bar di Cugnoli-l’Appicciu per beie u tradiziunale caffè incù l’acquavita.

Aa era piena zuffa di cacciadori armati cum’è fellaghà : fucili, mitragliette, Kalashnikov, granade difensive, bombe à fragmentazione, arme batteriologiche, un bazukà chì tirava i miloni di Cavaillon è ancu dui vechji cannoni di 75. L’avia arecati da Verdun u babbone di Cuccudrillu. Ghjè unu, u chjamanu cusì chì hà una buccona tamanta… Ghjustamente, Cuccudrillu dopu à avè aripostu i so cannoni in terra, s’era messu à guardà incù una certa curiusità i cani di l’ultimi ghjunti, noi. Ghjuvanpaulu è eo. È, per fassi vede omu gentile,  hà tesu a manu per carizzà a Signora Mimì. Quella s’hè messa à grugnulà fendu vede e so sanne. Dio ne libbari…Ci hè mancatu pocu ch’ella li stacche dui diti.

È dopu e cose sò andate cumè in tutte e battute. Incù a mitragliosa di Sciarlu Battesti, emu tombu vintottu Malgasci. I cani si sò campati. U pechinese di Karen era in dui pezzi : u capu in San Bartuli è u restu in Fiuminale. A signora Mimì era fiacca ch’avia corsu cum’una scema abbaghjendu per aiutà à fà e voci da in fondu di u ghjarcalu. È Ghjuvanpaulu è eo, inseme à tutti i cacciadori, ci emu fattu un spuntinu di quelli, sott’à i castagni di Cugnoli-l’Appicciu.

Ùn aghju altru nunda à dichjarà.

 

Masai marti 19 04

Partager sur :