Masai: À cavallu à u cavallu

Émission 

I valori: à ognu i soii

Ci hè a carne di cavallu ind’è e nostre lasagne ?...Aghju intesu male…Ci hè a carne di cavallu ind’è e nostre lasagne, ai dettu ?...Revuluzione ! Cellulite finale !

Vogliu u bioe, eo, è sentu in a mo bistecca u trimuleghju di a rivolta. Nant’à u Potemkine anu lampatu tuttu à gamba à l’aria per menu chè cusì. Vogliu u bioe, eo. U cavallu micca.

Sunemu u cornu di a cruciata contru à Findus, Spanghero è Olidada. Cambiemu issu mondu chì ci impetta di more serenamente, cunfiti di grassa è farziti di cholesterol. U veru scandalu di issa sucietà merza hè questu quì : furzacci à manghjà a carne di cavallu ind’è e nostre lasagne industriali. U ribombu di isse lite di ricchi,  ghjunghje in i rughjoni Saheliani. À mezu à isse pupulazioni di risu amaru, scappanu e rise amare. Omar, pensa in pettu, spartendu un pisu in vinticinque per nutrisce figlioli, moglie, caccari e cucini ch’ùn anu di carnale chè u nome : « ancu ancu s’elli avianu messu a merda ind’è e lasagne, si puderebbi capì l’azizume. Ma a carne cavallina… ». Perplessità d’Omar.

Ma chì ci faci cacà tù o Omar. Un pesi nunda. À pena sè tù esisti incù l’alitu debbule di u to fiatu meschinu. Findus, Spanghero è Olidada ci anu ficcatu a carne di cavallu in bocca, à noi. Crime de lese fasteté di u nostru manghjà cudré. Avà basta, hè ora chì u mondu cambie di base. Cellulite finale. Cellulite finale, Techjons à deux mains.

Abbiamu u sensu di i valori. I valori di i nostri Findus. Tù o Omar chì ne sai, ùn pesi mancu u to pesu di pidochji, ùn pesi...

 Ma Omar posa è pensa : « Aspetta un pocu o cellulite finale, u t’aghju da dà eo u cholesterol, viderai…

C’est la lutte rimbecca

Finite e to cuccagne

Prestu…

Ci serà a toia a bistecca

Ind’è e nostre lasagne »

 

 

Masai 15 02 13 lasagne cavallu

Partager sur :