Masai: a fata chì rende

Émission 

Brutte nutizie...

 Ùn vogliu più sente nunda nant’à les nappes phréatiques …Tanta neve chì hè falata, quanta acqua ch’ella s’hà da assuppà a terra… E senterete scaccanà e surgenti è e funtane issa istatina. Allora ùn venite più à circacci incù les nappes phreatiques è micca les nappes phréatiques . Sò piene. Piene piene piene. È noi dinù simu pieni, zuffi, imbugnati da issu celu imbugnatu, da l’avvene grisgiu. Oghje stava à sente a radiu, l’invitatu era Thierry Breton, ministru di l’ecunumia in 2005. Segondu ellu, hè megliu à dì a verità à i Francesi: principieremu à sorteci in 2020, micca nenzu. Sorteci, vale à dì budgettu in equilibru è ecunumia chì cresce. Puderemu principià à spende cum’è scemi in 2020, micca prima. Bon’ prò à quelli chì si seranu vivi tandu. In tantu, ci prumettenu torna qualchì bella strinta di curighjolu. Allora ùn hè, ùn ci rumpite i stifali, in più, incù les nappes phreatiques , chì tutti i castighi ùn ci falghinu à dossu à tempu.

Nant’à i giurnali e nutizie sò pessime : dopu à u scandalu di a carne cavallina  in e lasagne (vi ricurdate, l’imagini di i capizzoni di a fabrica Spanghero, a manu nant’à u core dicendu « la verité si jument »…), dopu à quessa dunque, prestu ùn si puderà più manghjà figatellu crudu senza mettesi in periculu di chjappà l’epatita E. L’epatita E. Avà ùn si dice più « e » si dice « è ». L’avertimentu vene da Brussele. Ghjè unu altru culpacciu contru à a parte a più magra di u Populu Corsu, i pruduttori di salumeria. Emu l’abitutine. Viderete chì ùn steranu tantu à  pruibbinne u cunsumu. È nascerà un traficu di figatellu, sott’à u mantellu d’inguernu o sott’à u tee shirt d’estate.

Resta à truvà cumu fà, incù i casgi per parassi da a listeria, l’ove chì danu a salmunella,  a carne ch’attacca u cancaru, e bietule a malinconia è a farina pisticcina chì rende pazzu. Senza parlà di l’aria ch’omu respira chì hè impuzzichita. Viderete ch’ùn steranu tantu à pruibinne u cunsumu.

Certi ghjorni aghju l’impressione « qu’une fée s’est penchée sur notre berceau » è ch’ella hà resu nentru….

Masai 26 02 13 A fata chì rende

Partager sur :