Masai : Finisca u cumulu di i mandati elettivi...

Émission 

Cumulu troppu: elezzione molle

Ma sai chì u cuntrastu nant’à u cumulu di i mandati hè qualcosa di curiosu. Da un pezzu i guverni anu u prugettu di limitallu è ancu di pruibbiscelu. È ùn la ci facenu. Perchè chì si vole pruibbisce u cumulu di i mandati? Ind’è perchè chì unu basta per compie cum’ellu ci vole u so travagliu d’elettu, vale à dì a missione data da l’elettori. Un elettu imbuffitu da parechji mandati, ghjè in periculu di vedesi stallà un pudere persunale, chì và al’ di là di e recule di a democrazia. È poi, un solu mandatu accunsente a ghjunta in pulitica di donne è d’omi novi. Ghjè un bisognu urgente. Certi vanu ancu più in dà chè issu cumulu in u spaziu. Pruponenu ch’ellu finisca dinù u cumulu in u tempu, limitendu à dui i mandati successivi. In parechji paesi hè cusì. In Scandinavia per u fattu. Allora, perchè chì i guverni si sevutanu è ùn la ci facenu à impone issa riforma chì rinfresca è rialza l’imagine di l’elettu ? Ghjè un obblicu, purtantu, s’omu ùn vole lascià spaziu liberu à u pupulismu chì nega a dimucrazia. Guardate in Italia. L’imagine di l’eletti hè un disastru. In l’opinione sò tutti ladri chì si techjanu. Risultatu: i pupulisti Berlusconi è Beppe Grillo ne facenu a so pruvenda eletturale è tiranu à palle rosse nantu à a rapresentazione naziunale. U fascismu ùn si strada micca altrimente.

I guverni ùn la ci facenu à impone a riforma di i mandati? Una spiegazione ci seria. U populu hè sanu sanu in favore. L’eletti elli sò contr’à. Quistione: ma cumu serà ch’ùn ci hè chè l’eletti à opponesi ? A risposta vene linda: sò elli chì prufittanu di a manna. L’affare hè chì, ghjè à elli ch’ellu si dumanda di decidene a fine. Si capisce:  s’appiccanu à i spechji per bluccà a riforma.  Ghjè per ciò chì i guverni ùn la ci anu ancu fatta. Hollande a li prova. Ma i so eletti ùn ne volenu sente a puzza è a prumessa di non-cumulu di i mandati hè interrata. Acquetta pulitica, cum’è sempre.

Cumulate di più per vince di più, averebbi dettu Sarkozy.

Per trè sciarpe compre, una gratisi, averebbi cappiatu Tapie.

Senza ride, a dimucrazia hà da finì per avella molle: u cumulu addebbulisce l’elezzione.

Masai 25 02 13 non cumulu

Partager sur :