Masai: hijos de puta

Émission 

Ancu e puttane anu una murale

Ci hè da ride… Ghjè a prima reazzione. Benintesu chì ci hè  da ride quandu a mio cullega giurnalista di a radiu publica Spagnola Iman Ouenzar,  mi conta l’oghjinche manifestazioni di l’indignati Spagnoli in Madrid è in altrò. I Spagnoli arrabiati, disgraziati, vittime di a crisa chì sumena miseria da una banda è empie e stacche di une pochi da l’altra, sfilanu in i carrughji di a capitale iberica è giranu nantu à a piazza di a Puerta Del Sol, arrizzendu pannelli nantu à i quale hè scrittu in lettare nervose : « politicos, hijos de puta ! ». A scrivenu è a chjirlanu ghjornu dopu à ghjornu. Si capisce, n’anu una techja d’esse stumacati, sè vo m’accunsentite l’espressione. Senza risultatu. N’anu una techja d’avè l’impressione chì solu u populu porta a somma, senza chì a pulitica trovi a minima soluzione. Via di scampu ùn ne vedenu. Allora, u solu gridu chì li esce da u pettu ghjè : « politicos, hijos de puta ! » (pulitichi, figlioli di puttana).

Un mese fà, e « putas », e prustitute spagnoli, , anu dettu, avà basta. Ùn vulianu più esse prutacuniste in issa lite. Dinù elle anu manifestatu, tutte d’aretu à un striscione tamantu chì dicia : « los politicos no son’ nuestros hijos » (i pulitichi ùn sò i nostri figlioli). Mancu elle ùn ne vulianu…

Simu d’accordu. Ci hè da ride. Ma finita a risata, ci trema u ghjargastrolu, quantunque. U ricusu di l’elettu si sparghje. In parechji paesi, Spagna, Italia, Francia, Grezia, per ùn cità chè quessi, colla è cresce a negazione di a rapresentazione di u populu, purtantu demucraticamente eletta. À l’orizonte, spunta u periculu di vede a demucrazia sbranculata da i lupi pupulisti. In Francia, a messa in esame di u ministru Cahuzac  è di l’is-presidente Sarkozy per affari di solli hè, crunulugicamente, l’ultima scalinata di a falata in infernu d’una demucrazia scempiata.

Hè forse ora di cambià. Anu prubbabbilmente ragiò quelli chì pruponenu di riflette à una altra Republica. Pulita è pulitica. Nubilmente

Ùn sò micca Zarassustrà, ma s’omu ùn la face finita incù a cantilena generale :  « politicos, hijos de puta ! », simu male. Emu da finì guvernati da un veru « hijo de putas ». Tandu emu da capì.

Serebbi megliu à capisce prima.

 

Masai 09 04 13 hijos de puta

Partager sur :