Masai: i funerali di a volpe

Émission 

Una fola hè una favula. A murale truvatela à di per voi....

A cunniscite a fola di i funerali di a volpe ? Mi dumandu perchè chì issa fola corre  istu pocu. Umbè…

Una volta, e galline truvonu a volpe à mezu chjassu. Era longa tirata in terra, ochji chjosi, codiferma.  « Hè morta, hè morta » si so messe à canzunà e galline. A sapete cum’elle sò e galline, tutte cosce è pocu cervellu. « Aiò, femuli un funerale » dissenu. Cusì fecenu. Anu sunatu e campane à murtoriu, si sò vestute di neru è u gallu hè  andatu à scavà a fossa in fondu di u chjosu.

A, quessa po sì, fù un bellu funerale. I piuli purtavanu i fiori. Era un funerale, cum’è quelli di prima, cantavanu dies irae è miserere à più pudè . Ghjunti vicinu à a fossa, facianu per aripone a cascia in terra, quandu a volpe saltò fora è e si manghjò tutte, gallu cumpresu. Firmonu solu e piume in terra.

Hè corsa a nutizia in tutti i pullinaghji. I nutiziali di  Carulina Saglione è Mariu Muraccioli à RCFM  anu apertu nant’à quessa. Ma a volpe si ne impippava, ohimè, cunniscia e so galline. Lasciò passà un pocu di tempu, poi, cambiò di paese è ancu di  rughjone è si stracquò in terra per fà a morta. A cumbina  era pigliatu una volta….Sò ghjunte e galline :  « hè morta a volpe, femuli u funerale », ballavanu à boccarisa, a piuma  cuntenta. L’affare hè chì, ghjera un paese ch’ùn si sentia à RCFM, riemetore ùn ci n’era, France 3 listessu, ùn lu pigliavanu. In più, disgraziatamente per Corse Matin, e galline  di issu locu facianu tutte parte di u settanta per centu di issu publicu specificu ch’ùn leghje mai u giurnale. Face chì, ciò chì ghjera accadutu un mese fà, in un certu pullinaghju, ùn la sapianu. In più, micca scema, ùn hè per nunda chì a volpe hà sempre spartu una prupaganda di quelle contru à i giurnalisti (a cunniscite, ùn vale a pena di ripete : tutti bugiardi, sottumessi, ùn emu bisognu d’elli…).

È fecenu u funerale (u cunniscite ùn vale à pene di ripete : anu sunatu e campane à murtoriu, si sò vestute di neru è u gallu hè  andatu à scavà a fossa in fondu di u chjosu, i piuli purtavanu i fiori, e galline cantavanu u dies irae. Ghjunti vicinu à a fossa, facianu per aripone a cascia in terra, quandu a volpe saltò fora è e si manghjò tutte, gallu cumpresu. Firmonu solu e piume in terra). ****

A tragedia hè corsa in tutti i pullinaghji,  in tutti i cervelli di gallina, duv’ellu ci hè poca piazza: l’indumane ghjunghjia una altra nutizia è ci vulia à sbarazzà per falla entre. A volpe chì sapia issa debulezza, hà campatu a so vita sana fendu a morta. È campa sempre cusì.

 

 

Masai 06 03 13 i funerali di a volpe

Partager sur :