Masai: indigestione di Papa

Émission 

Infurmazione: u troppu stroppia

U papa ùn hè mortu. Vole dorme. Ancu eo sò custrettu à dì a mea, à prupositu di a demissione di Benedettu XVI. Tutti i media di a Terra sana, impurtanti o minuti, ne parlanu. I crunisti, giurnalisti, cummentadori è osservadori  di tutte e sterpe è cuntinenti, ognunu hà digià datu una spiegazione. Tutte e spiegazioni. Sò u Masai, ùn possu fà a menu chè d’aghjustà a mo voce. Ma ch’aghju da dì di novu, postu chè vo sapete digià tuttu, o piuttostu, a cridete ? In fatti, sapete, sapemu, ghjustu ciò chì i servizii di cummunicazione di u Vaticanu ci dicenu, vale à dì, a cresta di e cosi. In u core nucleare di a nutizia ùn ci simu nè voi, ne eo. In e sorde lotte cardinali chì torcenu i visceri di i Palazzi Vaticani è chì anu purtatu probbabbilmente u Papa à piglià a so decisione, ùn ci entrimu. Cum’è sempre, l’attualità ci ghjoca à u ciambellu. I deus ex machina di a cummunicazione sò aggarbati per dacci l’impressione d’esse infurmati. Ghjè una nova illustrazione di u grande ingannu di a Sucietà Glubale di l’Infurmazione : sprufundati sottu à un sborru di nutizie, simu più annigati chè infurmati. À pruvà di sapè tuttu, si finisce per ùn sapè nunda. Ùn hè micca un cumplottu, innò, ghjè solu chì, in u grande marcatu mundiale, l’infurmazione hè un pruduttu cummerciale cum’è l’altri. Ci vole à andà in furia, esse sexy incù u pacaging per ingrillisce i cunsummisti di nutizie è passà à altre cosi, quandu a nova impassisce è ùn hè più attrattiva.

A demissione di u papa, quantu hà da dura in i media ?  Digià oghje, principia à perde a so putenza mediatica. Da quì à trè ghjorni hè finita. Si perderà in i fondi di a dimentichera.

È ùn saperemu nunda ? Ma ch’emu bisognu di sapè ? Ghjè forse quessa a vera dumanda. Ch’emu bisognu di sapè per chì a nostra civiltà sia più intelligente è ghjentile ? A verità. Ghjustu a verità.  

Ma quessa, hè un altru paghju di maniche. A verità ghjè una cerca permanente. Prima d’imbucanne u chjassu, ci vole à amparà u dupitu, u sceticismu. A sola certezza chì venga oghje da u Vaticanu hè questa quì : u papa ùn hè mortu. Vole dorme.

Masai 13 02 13

Partager sur :