Masai: l'analfabetu puliticu

Émission 

Brecht, centu anni fà....

 Puesia è riflessioni dopu à i risultati di l’elezzioni taliane.

Bertolt Brecht, u grande poeta e dramaturgu di a prima metà di u scorsu seculu, traccia in una puesia u ritrattu di l’analfabetu puliticu. A crisa, a miseria chì si sparghje, portanu in elle u periculu di a bughjura, vale à dì, a crescita di l’analbatesismu puliticu.Francatu l’usciu di a so casa, l’affari ùn lu riguardanu più, à quessu. Purtantu, esse pulitizati, qualsiasi u partitu o l’ideulugia, lascia intende chì, propiu una volta in carrughju, omu capisce di fà parte d’una sucietà cumplessa, d’una realità ch’ùn ci deve dunque lascià indiferente. L‘omu hè un animale puliticu, scrivia Aristotele. Quessa hè insitata in a nostra natura.  Ma l’analfabetu puliticu si ne infutte. Odia a pulitica è si piega à e dicisioni di l’altri. Chjode l’ochji. Ùn vole sparte u bè da u male in a so cummunità.

Brecht ci dà esempii di e cunsequenze dramatiche  di issu minenfuttisimu. I resultati di e legislative taliane ne sò una cunsequenza dinù. Portanu l’Italia, à esse una « folle nave ». Si pò teme chì, sè no cuntinuemu à infussacci in e restrizzioni è l’austerità, d’altri paesi imbocchinu e strade di a bughjura.

L’opinione, ghjè u solu nutrimentu di a demucrazia. L’opinione. Nimu ùn si ne deve cunsiderà esclusu. 

Eccu ciò ch’ellu scrivia Brecht, in i primi tempi di u vintesimu seculu. Centu anni fà :

 « U peghjò analfabeta hè quellu puliticu.

Ellu nè sente, nè parla, nè s’interessa à l’evenimenti pulitichi.

Ùn sà ma chè una cosa : u costu di a vita.

U prezzu di i fasgioli, di u pesciu, di a farina, di l’affitti, di i scarpi, di e medicine,  sò affullati à decisioni pulitiche. L’analfabetu puliticu, hè tantu sumere, ch’ellu si vanta di a so ignurenza è si spetturiceghja dicendu ch’ellu odia a pulitica.

Ùn sà, l’imbecille, chì da a so ignurenza, nascenu a prustituta, a criatura abbandunata, l’assaltante, è u peghju di tutti i banditi : u puliticu imbruglione, u maffiosu, u currottu, u sottumessu da l’imprese naziunali è multinaziunali. »

Masai 27 02 13 Brecht

Partager sur :