Masai : l'e-mail

Émission 

Un altra versione di a Creazione di l'Umanità

Ma sai chì, ghjè ora di rivene à a vita vera di Eva è Adamu, postu chì prestu emu da avè un Papa frescu. È chì in Corsica simu creaziunisti, cum’è l’americani.

Ramentemuci chì i nostri dui antenati sò stati sciarbati fora da l’Isula d’Eden, da …u Vechju. Sò dunque scalati in Cuntinente à creà una sterpa. Prestu anu pupulatu e pianure cutrate di maschi è di femine turzotti, braccilonghi è anchicorti, chì currianu cum’è scemi nantu à u permafrost. Eranu cuperti di peli è u culilisci.  Micca parlavanu. Sapianu ghjustu cappià « umbè», « han », « iscia », « mì ». Ùn avianu bisognu di parlà i Sumeriens. Pè a vita sumerina ch’elli avianu, l’onomatopee li bastavanu largamente. « Eù » facianu, quand’elli si vidianu. È si minavanu colpi in tupezzu ridendu. Era u sò ghjocu. U primu chì cascava mortu in terra avia persu. Dopu u si manghjavanu ...

Adamu è Eva fidighjavanu u spetaculu di a so sterpa, pensoni. « Umbè, ci anu da vulè quì e centunare di i milioni d’anni, per fà un impiecatu municipale… ». Ghjera esattamente ciò ch’ellu si dicia ancu ellu Dio, fidighjendu u cuntinente, quà ghjò. Si grattava u tupezzu dumandendusi s’ellu ùn avia fattu una cacata, finalmente. Piglia è manda un anghjulu à guardà a situazione. À u vultà, quellu dice à u so patrone :

- A situazione hè cattiva. In Cuntinente ci hè novantacinque per centu  di baulli. Di solu cinque per centu, poi mezu chè sperà.

Dio ci pensa un pocu è manda un altr’anghjulu à fà una contr’inchiesta. Di vultata, listessu raportu :

  • Nantu à a terra campanu novantacinque per centu di minenfuttisti chì oimè li corci. I cinque per centu chì restanu, ci poi cuntà. Ma sò pochi è conni.

  • Umbè, si dicia u Vechju, chì parlava solu. Cum’aghju da fà incù què a ropa, à creà una umanità chì sia capace d’eleghje un ghjornu à Sarkozy cum’è presidente di a republica…

Riflette è piglia è invia un e-mail à i cinque per centu per dalli curagiu, ch’ellu ùn perdinu a fede in l’avvene è ch’elli ùn esagereghjinu incù u cunsumu di lasagne Findus.

- È l’altri, i novantacinque per centu,   andate puru ch’ùn anu da stà tantu à capì. L’aghju da mandà à pasce, bruntulava u Patrone azezu.

 - È a sai tù cosa dicia issu mail ? dumanda Eva à Adamu.. - Innò… - Innò ? Allora simu ind’è a merda ! Manch’eo l’aghju ricevutu…

 

Masai 20 02 13 l'e-mail

Partager sur :