Masai: l'Omu di Cagna ind'è a nebbia

Émission 

L'Omu di Cagna è u Lione di Roccapina, duie persunalità diverse assai.

Ma sai chì aghju lettu à Corse Matin eri ? M’hè piaciuta a fottò in l’ultima pagina. Bella, a foto incù tutti i so culori. Un bellu camaieu da u biancu à u celestu. A legenda di a fottò ? « l’Omu di Cagna dans la brume ». Tamantu titulu. In inglish, « The Cagna’s man in the fog ». Pare un titulu di western. Ghjè a storia d’un cow boy zittu è mutu chì si stà rittu à listessu locu sensa movesi nè parlà nunda nunda. Pendante una ora é quartu, a durata di u filmu, face u musu. L’Omu di Cagna face u musu. L’Omu di Cagna in a nebbia o micca, face u musu. Perchè, mai s’hè sappiuta. Ma da duve li venerà issa abbitutine di fà u musu in permanenza in permanenza, à l’Omu di Cagna. Ùn li pudete dì mancu nunda, Diò ne libari. Mettimu, dilli qualcosa d’allegru, di legeru, pour détendre l’atmosphere, una cunneria per scioglie issa nebbia è fassi una risata trà d’amici. Eù, l’Omu di Cagna, mì mì mì, l’Omu di Cagna in pantaloni di seta, alza la gamba è tira una peta. Qual’hè ch’hà u curagiu di dì un affare cusì à l’Omu di Cagna. Una faccia severa è chjosa. Ghjè un misteru.

Guardate u Lione di Roccapina. À u Lione di Roccapina li ride tuttu. Incù u Lione di Roccapina pudete decunà. Eù, u Lione di Roccapina, mì, mì, mì…U Lione di Roccapina, fraga a patecca è lecca a susina !.. Hà hà hà è si face una risata. Ma micca l’Omu di Cagna. Sopra à tuttu quand’ellu hè indè a nebbia. Digià face u musu, è in più ghjè indè a nebbia. L’Omu di Cagna ind’è a Nebbia. Bellu titulu di filmu. Una tragedia cum’è l’Auberge Rouge. A tragedia d’un tippu chì face sempre u musu, un ghjornu capputeghja è si mette à strippà à tuttu u mundu. Ma puderebbi esse un titulu di filmu, ancu : l’Omu di Cagna Ind’è a Fumaccia. Un filmu pulizzeru. L’Omu di Cagna face sempre u musu, ma ghjè in gabardina è ùn ci sorte incù issa inchiesta di merda. È tossa perchè fuma troppu, a so secretaria a li dice. Ma puderebbi esse ancu un titulu di filmu : l’Omu di Cagna Ind’è a Lovia. Un filmu di culu. L’Omu di Cagna, puru…ind’è a lovia, face u musu listessu. Un tippu nurmale in issa situazione, po esse un pocu crispatu, và bè, ma u musu no…  

À, parlu parlu è u tempu passa. Basta à guarda una fottò di l’Omu di Cagna ind’è a nebbia per avè u spiritu chì piglia paesi.

Masai 21 02 13 L'omu di cagna ind'è a nebbia

Partager sur :