Masai: a muralisazione di i dinosauri

Émission 

A virtù, ghjè ricca o poverà?

Ma sai ch’ùn vogliu passà per un baullu ? Tutti i giurnalisti di u mondu tutti tutti parlanu di a « moralisation de la vie politique ». In Francese in u testu. Legi, scugnure, spetturicciate à chì si presenterà cum’è u più onestu è sopra tuttu, u più poveru. Ùn li sentite, deputati è senatori à a televisione. Ghjè à chì serà u più disgraziatu : « sò eo, a mo vittura hà dece anni, innò sò eo, aghju una Simca 1000, innò eo, aghju sempre a Fregate di u mo babbu è a mo casa hè in legnu ». A vi dicu franca, à mè mi face cacà issa corsa à a puvertà trà eletti naziunali. Passà per povaru, per fassi passà per onestu. Ghjè una arlecchinata.

Allora, ùn vogliu, eo, passà per baullu. Sò obligatu à dì a mea nant’à issu sugettu di moda : a muralisazione di a pulitica. Ma hè dilicata. Il faut se mefier de la persistance des phenomenes glissants, dice u pinzutu. Iè perchè, pare chì, noi, l’editurialisti, i crunisti, simu i facitori d’opinione. U mo patrone a m’hà detta : sì un facitore d’opinione, attenti à ciò chè tù dici chì dopu tutti anu da dì cum’è tè.

Sin’ora chì si dicia ? « Cum’è, quand’è tù sì elettu sè tù ùn ne prufitti per metteti dui solli da cantu, à cosa ghjova di fà a pulitica » ? Era quessa a murale stabbilita. Ci era un cunsensu generale. Avà a murale hà cambiatu. S’impone dunque u bisognu di muralisazione. Ùn s’arubba più. Quessa hè una. Ghjè u minimu. Duie, puru sè tù sì capiclanu, ùn ti pigli micca tutti i mandati per tè solu per tè. Sparti, ùn si solu. Altra cosa. Elettu sì, ma micca à vita. Ti faci dui mandati è dopu ti ne vai à maghjincà e to fave. E fave è i pulledri matti di a pulitica ùn ponu aspettà.

Aiò, hè ora, per una altra republica, pulita è pulitica. L’aghju detta eri, a ripetu oghje per incarcà u chjodu. Ma ùn site obligate d’esse d’accordu: a pudete pensà altrimente.

Sunniendu, mi sò messu à iputizà chì quellu meteorite milioni è milioni d’anni fà ùn s’hè micca abbatutu in u Golfu di u Messicu. Tandu, i dinosauri averebbinu evuluatu cum’ella hè accaduta per l’esseri umani : si serebbinu arizzati, u so cerbellu averia ingrussatu è in cima di a catena alimentare, ùn serebbimu micca stati noi, ma elli.

Quistione : cumu serebbi oghje ? Si cuntrasterebbinu nant’à a muralisazione è e Simca 1000, paracunerebbinu i so iPad è i so pippini ?

Fatalitas…Aghju paura di sì.

 

Masai 11 04 13 Muralisazione

Partager sur :