Masai: parabbula

Émission 

Fola metaforica in u mondu di i camelli...

Una volta ci era un camellu giovanu - un camillottu-. Và à truvà u so babbu, pensosu, è li dice : « O bà, mi sò fidighjatu in u spechju. Sò goffu. Ùn seraghju mai Alain Delon. Guarda issi mustaccioni chì mi pendenu nantu à u musu… ». U babbu u fideghja: « ma chì dici o muccicò !.. Quand’è tù sì in u desertu è ch’elle soffianu e timpeste di rena, l’altri animali si morenu affugati. À noi i baffi ci filtranu l’aria. È cusì campemu tranquilli !.. ».

« Ah..Ùn ci avia pensatu… »,  dice u camillottu, grattendusi u pappatoghju. Và bè ….Ma ùn li girava tondu. Dopu un pocu, ecculu chì face à u babbu :  « Iè, iè, iè,  a timpesta, a rena, i mustacci, d’accordu. Ma mi sò fidighjatu in u spechju, sò goffu. Ù seraghju mai Ghjuvanpaulu Luciani.  Guarda chì zampe ch’eo aghju. Larghe, parenu frissoghje. Aiò, ti parenu belle e mo zampe ? ». À u babbu principia à scappalli a pacienza : «E zampone ai ? Ma o sumerò, quandu in u desertu, l’altri animali s’affondanu in a rena è tiranu trè palmi di lingua, noi camelli, vulemu.. È cusì si campa tranquilli… ».

« O bà ai ragiò, ai ragiò, ai ragiò »,  balbuttava u camillottu alluntanendusi pensosu è capighjimbu. Paria l’ispettore Colombò… In più bella, si volta versu u babbu, u ditu puntatu per aria è li lampa, penserosu: « và bè o bà, a timpesta , l’oasi, i pedi tamanti, i mustacci chì filtranu… Ma ùn ci hè Cristu à fà, mi guardu in u spechju è sò goffu. Un seraghju mai Tumasgiu Brunelli incù e mo duie gobbe nantu à u spinu. Aiò aiò… À u babbu avà li vene a zerga. « Ma per la miseria, cumu poi dì un affare simile !.. Quandu in u desertu l’altri animali si morenu di sete, noi avemu e gobbe piene d’acqua. È cusì si campa tranquilli… ».

«Torna una volta o bà, a ragiò hè a toia, alò », face l’ispettore Colombò alluntanendusi è pruvendu di tirà un pocu di fume di u so vechju zicaru. D’un colpu si pianta. Riflette. Si gira versu u babbu è li dice à voce bassa, cum’è s’ellu pensasse à tempu ch’ellu parlava : « a mi capiscu o bà, incù i mo cumulus nantu à u spinu, u mo filtru à aria nantu à a nappa, e mo zampe à frissoghja è u mo spinu à lavatoghju in u desertu volu, senza more nè di sete nè affugatu. Ma puttana gobba, chì ci futtu tandu, quì, à u zoò di Vincennes ... ».

 

Masai 12 04 13 parabbula in u mondu di i camelli

Partager sur :