masai: Piuvianu cunfetti....

Émission 

Hè vera, mi ne ricordu.

A sò ch’ùn m’avete da crede, a sò. Vi sentu digià diciulà : « quessa a s’hà inventata ». Purtantu hè vera. L’aghju vista eo.

Una volta in Ficaghja, sò piossi i cunfetti. Iè ; i cunfetti…

Ghjera un zitellone è una mane di marzu, mi ne ricordu, surtia di casa sott’à un celu marzulinu. Mi ne ricordu chì, mi disse, tè, oghje u celu hè marzulinu, trà biancu è grisgiu, è ghjè una cosa nurmale vistu chè no simu di marzu.. È un silenziu, mi ricordu... Ghjè quant’è chì, tuttu issu cutone bassu ch’amantava u celu, s’assuppesse i rimori. Ùn sentia mancu u strufinà di i mio scarpi nant’à e petricelle di u chjassu. Subbitu subbitu, aghju trovu issu silenziu stranu è poi nò. Mi sò avvistu chì ghjera propiu quella qualità di silenziu chì regna nantu à a natura, una stonda prima ch’ellu nevi. Ghjera cuntentu, mi ricordu. Megliu, sentia sparghjesi in mè issa letizia muta chì mi colma sempre l’affettu, ghjustu prima ch’ellu nevi.

È po ùn ci aghju più pensatu.

In più bella, s’hè strappatu u cutone grisgiognu di u celu è anu principiatu à piove i cunfetti. Svulaghjavanu cum’è farfalline culurite, verdi, rosse, celesti, gialle, turchine. Mi n’aghju messu unu verde in bocca. M’hè parsu ch’ellu avia gustu di menta. N’aghju assaghjatu un altru d’un rossu lavatu : avia un sapore di fragula.

Sò cunfetti ! Sò cunfetti ! Mi sò messu à mughjà. È sò corsi tutti, smaravigliati è scimigniti cum’è mè. Sò cunfetti ! Sò cunfetti ! Gridavanu, capi è bracci pisati versu u celu. Pruvavanu di coglieli mettendusili in stacca, ma ne piuvia troppu. Prestu, a terra, fù cuperta da un stratu culuritu è prufumatu chì scrichjulava sott’à i scarpi. Ognunu si purtò in casa a racolta di cunfetti, paracunendusila, fendusili tastà, in un ambiente di felicità cullettiva. Issa qualità di felicità, chì nasce d’un accadutu imprevistu chì accumuna à tutti.

Fù una ghjurnata signalata.

Aghju aspettatu, inguernu dopu à inguernu, ch’ellu piovi di novu cunfetti. Ma u nulu, passatu una volta, ùn hè mai più turnatu, nè in Ficaghja, nè in a Croce, nè à a Porta, nè mancu in Pulverosu.

A sò, m’avete da dì, ch’eo a m’aghju sunniata. Purtantu nò.

L’aspettu sempre, u nulu du cutone grisgiognu, chì assuppa tutti i rimori, fendu nasce u silenziu d’una tessitura speziale, chì si sparghje propiu prima ch’elli caschinu i cunfetti da u celu.

 

Masai 07 03 13 i cunfetti

Partager sur :