Masai: ritornu d'America

Émission 

Per andà da New York à Bastia, longa hè la via.....

Bonghjornu. Sè vo sapessite cum’eo sò cuntentu di parlavvi di novu. Innò, ùn mi mancavete micca, ma sò cuntentu d’esse incù voi.

Induv’eo era ? In New York. In America. Bù l’America. Cumu era? Bù...Iè iè, bù, ma cumu era? Bù, tamanta. Nova Yorca hè tamanta. Casali tamanti. Carrughji tamanti. Vitture tamante. Ghjente tamanta. Bistecche tamante. È viaghjà è viaghjà fatica tamanta. Magazini è magazini tamanti à circà i pantaloni. vintimila chilometri per cumprà i pantaloni. Capite, u dollaru hè calatu…

È po tamanta libertà. Micca a statua. A libertà. Freedom. Culà pudete campà cum’ella vi pare. Vi vestite cum’ella vi pare, nisunu face casu à voi. Cusì m’avia spiegatu Madama Sinibaldi, a mio vicina. L’avia intesa à a telé. Allora n’aghju prufittatu per fà ciò ch’ùn si pò in Corsica. Mi sò vestutu à Americanu : camisgia rossa western stacchittata, incù i so frisgetti à pindalocchi, Levis stretti stretti appiccicati à a polpa cum’è a stintina nant’à u figatellu, buttine cow boy à tacchi alti. Quand’eo viaghjava paria Luky Luke à pena varcatu da u cavallu. È bè. Ùn hè vera chè vo vi pudete veste cum’ella vi pare in New York. Era nant’à Fifth Avenue. Tutti mi guardavanu è ridianu. Una scaccanata tamanta. Bonu, quandu unu m’hà dumandatu s’eo vulia andà à Broadway à ghjucà ind’è u remake di Midnight Cow Boy, aghju capitu. Una vergogna tamanta.

Ch’eo vi dica unu affare. Tutta a Corsica era in Nova Yorca. Ùn passava un ghjornu senza ch’eo casche à nasu à nasu incù una cunniscenza isulana. Chì seca.

Aghju parlatu assai incù a ghjente di culà. Ghjente gentile sè vo sapessete. Mi dumandavanu spessu da duv’eo venia. Li rispundia, vengu da a Corsica. È bè, sappiate una cosa: a Corsica nimu sà duv’ella hè. Una grande parte ùn sapia mancu chì in u mondu ci hè un locu ch’omu chjama Corsica. Allora, quand’eo sò vultatu da culandi, mi so avvistu ch’eo ùn avia più billicu. È ùn sò più duve m’aghju da grattà. Purtantu, aghju un pruditu tamantu.

 

 

Masai 19 02 13 NY

Partager sur :