Masai Storie di Papa

Émission 

Un papa neru averia una anima?

 

Ma sai chì mi sentu obligatu di dì a mea à prupositu di issi cuntrasti papali. U Papa chì si ne và, l’altru ch’omu aspetta. Benedettu avia u dirittu o nò di demissiunà ? U Papa novu serà africanu o micca ? È letica chì mi ti letica ind’è i caffè à l’ora di l’apperitivu. Vistu u sbolle di issu mostu vaticanu, ùn possu fà à menu chè d’aghjustà a mo voce. Ma l’affare hè chì mi n’enfuttu di e minestre vaticane. Ùn pensu nunda à prupositu di Papa Benedettu chì parte è d’un forse Papa Mamadù chì ghjunghjeria. Aghju u dirittu d’ùn avè un parè precisu à issu prupositu. Nant’à issu affare ùn pensu nunda. Ùn pensava nunda. 

Poi, quand’eo sò cascatu nant’à una intervista di Munsignore Vingt Trois, l’arcivescuvu di Parigi, à u giurnale 20 Minutes, mi sò messu ancu eo à avè una opinione.  Prima, ùn hè per nunda ch‘aghju dettu « Papa Mamadù », perchè chì, Dédé, André Vingt Trois, dopu à avè palisatu chì e so prubbabbilutà d’esse Papa ellu, eranu pare à e mee di fami un scrabble incù Nicole Kidman, u giurnalistu l’hà dumandatu s’ella era ghjunta l’ora d’un Papa africanu. Or basta. Quellu chì disse un mese fà chì u matriminiu omosessuale era « supercherie », hà rispostu chì « u fattu d’esse africanu ùn hè una qualifica chì basti ». U citu. Sin’à quì finalmente ùn ci hè nunda di propiu male. Peccatu ch’ellu abbia aghjustatu dopu : « è ancu sè n’aviamu un Papa africanu, ùn credu ch’ellu anderia à ballà in pagnu nant’à a Piazza Navona ». À Dédé Vintitrè li sò rotti i chjerchji o chè ? Chì ghjè issa idea miserabbilista di l’Africa, d’un cuntinente pupulatu da i salvatichi bravi chì forse anu una anima.  Chì ghjè issa paura di u neru, in una chjesa ingrunchjata, reazziunaria è anticogna. Un Papa neru neru ch’effacheria à u purtellu vaticanu per un « houba houba » urbi et orbi, seria forse l’iniziu d’un necessariu Vaticanu Trè.

Eccu. Pè u restu, francatimente mi n’enfuttu. Sò cuntentu, ci vole ch’eo a dica, d’avè lettu nantu à Corse Matin ch’ellu ci era statu ancu dui Papa corsi in a storia. Dui salvatichi. N’hà da corre l’acqua sottu à u Ponte à Golu, prima ch’elli eleghjinu u prussimu Papa nustrale. Un semplice calculu ci insegna chè n’averemu nenzu u primu imam corsu.

Innò. A dicu per annervabbi.

Masai 22 02 13 Mgr 23 Papa

Partager sur :