Masai: u Somaliland

Émission 

Somaliland o Corsicaland?

Quant’ellu n’hà fattu viaghji, u Masai….

Ricurdatevi, i v’aghju conti. Bujumburà, u Tanganikà in cerca di Livingstone, a Mungulia e i so Yack, U Buthan è e so Buthane, a gara di Timphù è i so treni in legnu. U Masai, face cunnosce o mondu  à l’auditori tantu rurali chè cultivati.

Serviziu publicu, serviziu publicu….

Oghje, u guerrieru Masai, eo, voltu dà a Sumalia, duve sò andatu per pruvà di smagrì. A Sumalia incù u so emblema naziunale, u fisculu mariò (la meringue). I Sumaliani, a sapete, sò magri magri. Incù e surelle Vasetti passavamu d’avanti à l’ospidale di Hargeisa. L’usciu era chjosu. Ci era un fogliu scrittu puntarulatu nantu : « In casu ch’ellu ùn ci sia nimu, fate passà u malatu sottu à l’usciu ».

È bè, a Sumalia puderia esse a Mecca di i muvimenti autonomisti. Tutti i canti di issu paese, cumpostu di tribbù à a fame ch’ùn si ponu pate in pittura, volenu l’autonumia. U fondu puliticu di l’autonumismu sumalianu  si pò sintetizà in a celebre frase di u cugnatu di Lumumbà : « andate tutti à cacà ».

Un zinzicu di geopulitica microregiunale. A u nordu ci hè a regione di u Somaliland.  So stati i primi à staccassi dichjarendusi indipendenti. À fiancu, più à levante, avemu u rughjone di u Puntland. Cum’ella a lascia intende u nome, ghjè chjucu chjucu u Puntland. In 98 i capitribbù Puntlandesi si sò detti autonomi. Quand’elli l’anu dumandatu perchè, anu rispostu : « chì v’ariguarda ? ».

À tocca tocca incù u Puntland, avete u Galmudug. « Ancu noi, ancu noi » anu mughjatu e tribbù di u locu. È si so messe à fà ognuna ciò ch’ella vulia dendu calci in corpu à ch’ùn capia è chjamendu issu modu d’urganisazione « totocalcio ». À punente, truvate u Jubaland. I Jubalandinchi, più identitarii, anu spiegatu :  « vulemu esse autonomi chì noi simu neri, quandu l’altri sò neri neri ».  

Infine, per cumplicà tuttu, ci hè u casu di u Maakhir, trà u Somaliland è u Puntland, di u quale parlavamu prima. U Maakhir, ghjè una pianura desertica grande cum’è a Piazza di u Diamante in Aiacciu. Ci soffia un ventu callu. Ùn nasce un filu d’erba. U Somaliland è u Puntland, si cuntrastanu chì rivendicheghjanu issu locu. In risposta, i quattru pastori chì sò tuttu tuttu sanu sanu u populu Maakhirese, anu rimbliccatu : «  postu ch’ella hè cusì, dichjaremu ancu noi a nostra autonumia ».

Bonu, smagritu ùn aghju tantu smagritu hè vera, à colpi di fisculi mariò. Ma aghju amparatu. Ghjè tuttu benefiziu pè u Corsicaland.

 

 

 

Masai 15 04 13 Somaliland

Partager sur :