Masai: u test d'Inglese

Émission 

U bislinguismu; iè. Ma Corsu-Inglese...

Innò ch’ùn ci vole à esse bislingui. Ùn la dicu per mette a puzza, ma innò, bislinguu nò. Perchè ? Perchè chì u Corsu è u Francese ùn bastanu. In u mondu d’oghje, ci vole à parlà d’altre lingue. Parechje. Talianu, Spagnolu, Inglese. Sopra à tuttu l’Inglese. Pigliate noi, i giurnalisti. Simu obligati di sapè parlà a lingua di Lady Gagà. Ci vole chè noi siamu bislingui Corsu-Inglese, dinù.

Tumasgiu Brunelli, Mariu Muraccioli, Petruluigi Alessandri, tutti, emu passatu un test d’Inglese per entre à RCFM. L’emu riesciutu. S’avia fiascatu u test d’Inglese, m’averianu rimandatu in Ficaghja, ind’è u mo grataghju. È seria oghje da l’altra banda di u transistor, duv’è vo site voi chì mi state à sente. Micca chì, seria statu felice listessu, ma pè a mo moglia, una citatina bastiaccia sempre in tacchi alti è pantaloni stretti, in Ficaghja ùn ci era à bastanza magazini, ùn ci era micca a Traversa. Lasciemu reghje. Dunque, Petruluigi Alessandri hà riescutu u test d’Inglese.

U primu nivellu di issu test, per esse giurnalistu principiante (quellu chì porta u caffè a matina è parte solu pè e strade di u Niolu d’inguernu à circà l’infurmazioni), ghjè questu quì. Femulu inseme. Ete da dì in Inglese issa frase:     «  Trè streghe guardanu trà rillogi Swatch. Qualessa a strega guarda qualessu u rillogiu Swatch ?  » Avà ripetite a traduzione à tempu à mè è à alta voce:

Three witches watch three Swatch watches. Which witch / watch which Swatch watch ? "

Ma per esse giurnalistu d’altu nivellu, cum’è Petruluigi o eo, duvete riesce u test supranu, quellu di l’esperti.****

Ci vulerà à dì in Inglese:****

"Trè streghe Svedesi e transessuali, guardanu l’achi di trè rillogi Sguizzeri Swatch. Qualessa a strega (Svedese e transessuale) guarda qualessu l’acu di qualessu u rillogiu Sguizzeru Swatch? "

Ripetite à tempu à mè: "Three Swedish switched witches  watch three Swiss Swatch watch switches. Which Swedish switched witch  watch which Swiss Swatch watch Switch? "

U bislinguismu Corsu-Inglese ?  Ghjè una priurità …

 

Masai 14 02 13 corsu inglese

Partager sur :