Masai: un affettu à fette (parte 1)

Émission 

Una storia d'amore purcina

 

I spermatozoiti di Marcantone eranu magrentini chì ohimè.  Mancavanu in più di quellu entusiasmu chì l’averebbi accunsentutu di ficcassi in un ovulu un suppulellu cumpiacente. Ma tantu, s’ella fusse, e trombe uterine di a so moglia Soffìa (cugnumata Sòffia da  une poche chì si pretendianu e so amiche), eranu annudate cum’è s’elle avessinu fattu u serviziu militare ind’è a marina. Infine, per accurtalla, u coppiu era sterile. Per ùn lasciassi andà à una malincunia ch’omu puderebbi capì, trasferianu u bisognu d’amore di u quale eranu zuffi. Ma e piume di e galline o i dolci ochji di e so capre, ùn bastavanu à assuppanne u sborru.

Hè sigura chì, una bella faccia a facianu, per fà finta di  palisà ch’elli a s’avianu ingullita, ch’elli s’eranu accunciati à a sorte pessima. Ma certe volti, impustati di notte à luna nova, à bocca torta, pigliavanu i figlioli di l’altri à petrate.

Una mane, a lofia avia figliatu. Una bella manata di puchjuculelli bianchi è rossi chì prumettianu un bellu sfocu à u bisognu di maternà di Marcantone è di Soffìa. I guardavanu à unu à unu, fendu cummenti nant’à u grugnu di l’unu, a cudinchjula atturcinata di l’altru, denduli à i puchjuculi, nomi da pudelli tene caru, Petruluigi, Karima, Jason, puru s’ella era certa chì, cum’è tutta a razza purcina, avianu da finì appicati à travi. Ma in tantu, eranu un’ unguente nant’à e so ferite affettive. In più bella, pigliendu di mani l’ultimu ch’elli ùn avianu ancu à fidighjà, si sò avvisti ch’ellu avia una faccia umana. Innò, Soffìa era andata à a scola, a sapia chì Marcantone ùn pudia…ma l’hà guardatu listessu, dupitosa, cum’è per vede s’ellu ùn ci era una sumiglia. Innò, era una cosa assurda. In pettu s’hè trattata di scema.

U fattu stà chì, una faccia umana l’avia, u puchjuculellu. Sò corsi quelli di l’INRA di San Ghjulianu à prelevà l’ADN, Mario Grazi di Corse Matin à piglià e fottò, Eliane Parigi incù lu so Nagra per intervistà a Lofia, Petru Leca di France 3 à circà u pelu in l’ovulu. Soffìa chì sapia riceve s’hè fatta aiutà da Sòffia per fà e manfare. Hè stata una bella festa pè u puchjuculu à faccia umana. Marcantone l’avia chjamatu Jean Louis.

Ma u tempu passa è ghje scadutu. Mi dispiace. Dumane vi dicu cum’ella hè finita.

Masai 28 02 13..

Partager sur :