Masai: un affettu à fette (parte 2)

Émission 

Jean Louis ingrassa...

I spermatozoiti di Marcantone eranu magrentini, e trombe uterine di a so moglia Soffìa eranu annudate. U coppiu era sterile, alò, è in brama pazza di sparghje un amore chì rumpia i chjerchji di a so vita affettiva…

Ta tzin….Ci vulerebbi una musica quì, ma per ciò ch’elli mi paganu feremu senza…

Un affettu à fette.

Ghjè a segonda parte di u sfugliatinu principiatu eri. U feuilleton sè vo preferite…

Vi ricurdate, a lofia avia figliatu è à mezu à i puchjuculi, ci n’era unu ch’elli chjamonu Jean Louis. Perchè ? Perchè chì avia una faccia umana…..

Eranu corsi l’esperti è i giurnalisti à vede u fenomenu. Nimu capia cum’ellu era pussutu accade un affare cusì. Tutti si sò grattati u tupezzu. Innò micca tutti, certi si sò grattati e palle. Dopu anu fattu « hem hem…Umbè… ». Poi n’anu avutu una techja d’avè i pedi in a fanga di u carciulottu. L’esperti sò andati à fà « hem hem…Umbè… » è à grattassi  in altrò, nantu à d’altri sugetti vogliu intende. I giurnalisti sò corsi in Corti. Ci era una cunferenza stampa per dì ch’ellu si circava sempre a chjave di l’espace de convergence è chì forse ci vulerebbi à dà una spazzata quand’ellu si riescerà à entre. Infine a vita cuntinuava,. Ùn n’avianu po dà fà un furmagliu di porcu di issu puchjuculu.

Micca subbitu…

Marcantone è Soffìa. A vita s’hè messa à cuntinuà ancu per elli. Anu allevatu à Jean Louis unghjendulu d’un amore permanente, un mele, chì culava da a so ferita affettiva è facia ingrassà bè u puchjuculu à testa umana. Eranu fieri. A so criatura facia u lardu.

Facia u lardu…

Tempu passendu, eranu sempre fieri è sbuttavanu sempre d’amore, hè vera. Ma ùn era più chjara chjara, ùn sapianu più s’elli eranu fieri cum’è genitori o cum’è allevatori. Ma d’una banda quant’è da l’altra, era sempre amore. Jean Louis, ellu lu corciu, ùn percepia nunda di l’ambiguità di issu amore. Tuttu ingrassendu, hè ghjuntu à trè anni è ci hè vulsutu à mettelu à a scola.

Ma quessa o ghjente a vi diceraghju dumane chì i mio dui minuti sò passati….

 

 

 

Masai 01 03 13 un affettu à fette 2

Partager sur :