masai: un affettu à fette (parte 3)

Émission 

Finisce male, cum'è sempre...

Jean Louis ingrandava…Jean Louis ! U puchjuculu à faccia umana allevatu da Marcantone è Soffìa (ch’ùn pudianu avè figlioli). È ingranda è ingranda, grassu è tondu, hè ghjuntu à l’età d’andà in scola….

…..

Un affettu à fette, parte ultima di u sfugliatinu principiatu a settimana scorsa.

…..

A v’aghju detta, Marcantone è Soffìa allevavanu à Jean Louis, avvintu d’amore quant’è s’ellu fusse statu u so figliolu. Aspettavanu chellu sia più grande per purtallu à u Salone di l’Agricultura à rapresentà a Corsica. Fieru, in pienu salone, in cumpagnia di Ghjuvanpetru Acquaviva è Isabelle Don Ignazi, à tichjassi incù l’omi pulitichi, à fassi piglià in fottò incù l’omi pulitichì.

In tantu, eramu di settembre, a mane di l’entrata di e scole. Marcantone è Soffìa avianu messu un bellu sciortu marinu à Jean Louis incù la so maglia frisgiata. Era in scola materna. Bislingua. Bislingua Corsu-Francese. Scola chì integri u purcinu in u bislinguisimu, ùn ne esistia.

Ha ind’è, Jean Louis po ùn era Einstein, ma puru bassu u so nivellu bastava par sevutà in scola. Quandu a maestra di a scola bislingua u chjamava, « Jean Louis viens içi » (ùn sapia micca parlà Corsu) dicia ouiiiiiii, ouiiiiiiiiiiii. Li piacia d’esse d’accordu (ouiiiii ouiiiiiiii).

I so resultati eranu cusì cusì, ma era un cameratu tondulu è ottimistu, tutta gioia cumunicativa. I so cumpagni li currianu à pressu gridendu. Si campavanu. Ellu dinù. In a corte di recreazione facia falà i so pantaloni corti per fà vede a so cudinchjula atturcinata è si campavanu di rise. Ellu dinù. U tenianu caru.

Ma, a vita purcina, a sapete cum’ella hè. Purcina. Soffìa à l’appiattu si trattava contr’à a sterilità: colpi di piccature. È fà è fà…S’hè trova incinta.  Marcantone era felice, cantava, saltava. Prestu di Jean Louis ùn anu più vistu a faccia umana, ma solu u corpu di maiale.

Quand’elli anu decisu di fanne prisutti, i so cumpagni di scola, à i quali piacia tantu, n’anu tutti vulsutu una fetta.

-        « À dì chì, ùn avemu mai pensatu à circalli una sumiglia », disse pensoni Marcantone fidighjendu i prisutti appiccati.

-        « Hè forse megliu cusì… », rispose a moglia gardendulu incù u pinzu di l’ochji.

 

Masai 04 03 13 Un affettu à fette 3

Partager sur :