Masai: Ùn circà o Petrantò chì a matematica ci ghjoca contru…

Émission 

Ind'è "addisperu" si sente "speru"

Lascia corre o Petrantò, lascia.

Stami à sente, ùn ci pensà più à quessa.

Si n’hè andata ? Bon’ viaghju. Ne truverai una altra, ne truverai.

Ma chì cerchi à capì u perchè è u cumu.

Si ne andata, chì studieghji o Petrantò.

 Chì tantu….

 Più studieghji è più sai. Và  bè.

Ma, più sai è più ti scordi

Più ti scordi è menu sai.

Dunque,

Più studieghji è menu sai

Ùn poi andà contru à issa logica.

Cummanda a matematica.

Stà à sente à unu ch’ùn ci capisce.

 A poi ancu piglià à l’aritrosa. Hè listessa.

Perchè chì…

Menu studieghji è menu sai

Ma, menu sai è menu ti scordi

Menu ti scordi è più sai.

Dunque,

Menu studieghji è più sai

Ghjè un teorema. Ficaghjacciu, forse, ma teurema.

Stà à sente à unu chì vede u pelu in l’ovu.

 Perchè chì, tantu…

 Più capisci è menu ci hè da capì

Menu ci hè da capì è menu cerchi  à capì

Menu cerchi à capì è menu capisci

Dunque,

Più capisci è menu capisci

Ghjè matematica. Ti ghjoca contru a matematica, o Petrantò.

Ùn dì nunda. Statti zittu chì ghjè cusì,  ùn vale a pena à torce u nasu.

Stà à sente un scemu.

 Iè, un scemu. Sappia chì…

 Più si scemu è menu ai logica

Menu ai logica è menu ci hè da scimì

Menu ci hè da scimì è menu scimisci

Dunque

Più si scemu è menu scimisci

 Face chì...Femu i conti

 Più studieghji è menu sai

Menu sai è menu scimisci.

 Aiò, innò ch’ùn sì solo o Petrantò

Innò ch’ùn simu soli

Veni, andemu

A matematica ci ghjoca contru….

 

 

 

Masai 14 03 13 o Petrantò

Partager sur :