Storie d'amore

Émission 

U "chat", l'avvicinera d'oghje.

Settemila, serebbite à dracà nant’à Internet, in Corsica. L’aghju letta nant’à Corse Matin eri. Settemila, à circà una anima « surella », dice u giurnale. Francatimente, ùn credu ch’ellu si tratti di circà una surella, ma piuttostu, per l’omi,  di fabricassi una vacascia imaginaria, quella femina di e pulsioni maschili,  o, pè e donne,  d’inventassi  un cumpagnu per una notte o un maritu per una vita.

Cambianu l’usi. Una volta si struzzicavanu e donne andendu à circà l’acqua à a funtana. Dopu hè venuta l’epica di i balli : a storia d’amore corta o longa principiava incù un tangò. Poi, hè affacata a moda di a « surboum » induve s’andava à « fruttà ». Avà ci hè u « chat », trà ghjente chì, pigliendusi per d’altri, fantasmeghjanu una ombra à a quale mandanu parulle ch’ùn si ponu dì chè piatti d’aretu à una maschera. Purtantu, l’anu in carrughju, i candidati è e candidate à un lampu d’amore furtivu o à qualchì prumessa d’eternu.

Ma, passi di a funtana, balli di paese o chat nant’à Internet, ciò chì vene dopu hè finalmente sempre listessa. : ci vole à accunciassi, à arrangiassi. Un illustrazione d’un acconciu tra moglia è maritu, a m’hà conta u m’amicu Claudio di Piumbinu, in Tuscana. Ne prufittu per salutà l’amichi Tuscani chì stanu à sente a RCFM. Ci n’hè une pochi. Una moglia, sempre dumandava à u so maritu ingegnere, quand’ellu vultava di u travagliu, di falli  una piccula riparazione  in casa. S’ellu si trattava di tuppà un tufone, u maritu rispundia : « ùn sò micca muradore !.. ». S’ella dumandava ch’ellu arrangie une prisa eletrica, li venia di rimbeccu : « ùn sò micca eletricistu !.. ». Face chì hè stata obligata di chere à un vicinu un intervenzione nantu à a mascina à lavà ch’ùn funziunava. Quellu dice di sì, ma à una cundizione. È  prupone à a donna una alternativa : o li face una bella torta o si cuncede à ellu.

A sera, volta u maritu ingegneru è a moglia li conta l’affare. Quelli subbitu : « è tù, chì l’ai rispostu à u vicinu ? ». « O caru,  ùn sò micca pasticcera… » .

Ghjè per quessa chì, sì per casu avete paura ch’ellu v‘accadi una cosa simile, vi possu cuntà a fola a più corta di u mondu:  Una volta, un omu dumanda à una donna : « mi voli spusà » ?.   A donna risponde : « innò ». È l’omu campò felice u restu di a so vita.

 

 

 

Partager sur :