U Paese di e Meraviglie

Émission 

U Mondu di e Meraviglie.

Ma tandu, face Alice,  sì u mondu, sensu propiu ùn ne hà, quale ci impetta d’inventaccine unu ? L’hà detta Alice, quessa. Alice, quella di u Paese di e Maraviglie.

Sabbatu, una volta torna, a Corsica s’addunisce. In Bastia, ci seranu tutti – o quasi- à manifestà contru à a fine di l’Arrestati Miot, decisa da u Cunsigliu Custituziunale. Lasciemu reghje e spiegazioni : ognunu cunnosce l’argumentu, hè spostu da tantu nant‘à i media.

U mutivu di l’abrucazione, nasce da issa spezie di rettitutine republicana, chì vole ch’omu sia tutti pari rispettu à a lege. A Lege Fiscale per l’occasione. Và bè. Ghjè una filusufia di l’Uggualienza à a quale ùn pudemu chè accunsente : sparghjimu tuttu nant’à u tavulinu di i raporti trà a Corsica è a Republica Francese è videmu sè noi, Isulani di Corsica, simu ugguali in tuttu à l’altri Francesi. Serebbi curiosu di fidighjà a cunclusione di issu audit generale di l’Uggualienza Republicana.

Cum’è tutti i populi, emu bisognu d’una guerra per cuncultacci è ogni tantu a furtuna ci favurisce, denduci una occasione di falla. Ci serete dunque à manifestà sabbatu in Bastia, ùn sia chè per quessa. Ùn mancheranu chè quelli chì, palisendusi reazziunarii à ciò ch’ellu dice u Populu Corsu (hè vera, prubbabilmente male, o troppu, o troppu pocu), si sò impetrati in u cunservatismu. U cunservatismu natu da una paura irraziunale di a demacugia pulitica. A paura di a demacugia pulitica hè una qualità, ma diventa un difettu, quand’ella sterilizeghja a mente.

Di manifestazioni in pruteste, a lite trà Corsica è Cuntinente dura, dura. In fatti ùn hà mai cessatu. Issu mondu hà un rigiru ch’ùn ci va ? « Inventemucine un altru », dice Alice à l’entre in u Paese di e Meraviglie. Ma hè dura. I primi passi d’Alice in issu mondu novu, sò difficiuli : ùn ci capisce più nunda, hè in crisa. In crisa d’identità per u fattu, ma in crisa di sapè dinù : ci vole ch’ella si scorde di tuttu ciò chì a scola l’hà amparatu, per capì, raziunalizà, u mondu apparentemente assurdu di e Meraviglie.

Issu Paese, hè un locu duv’omu cuntesta l’ordine stabbilitu è arbitrariu, di ciò ch’hè presentatu cum’è « u mondu veru ». Veru, ùn si sà,  ma incapiscitoghju, hè certa.

Sabbatu, serete tanti, forse,  à facci i vostri primi passi, in issu mondu difficiule, ma liberatoriu, di e Meraviglie.

 

 

Partager sur :