Émissions Toutes les émissions

Lindumani d'elezzioni

À chì sente è à chì ùn sente

 

Emu pusatu. Emu pensatu. È oghje, i risultati di e municipali si meritanu duie chjachjare.

À chì hà vintu è à chì hà persu, forse qualcosa vole dì. Qual’hè ch’hà persu? In Bastia, Aiacciu è in parechji altri lochi, anu persu i rapresentanti di famiglie pulitiche ch’ùn anu sappiutu esse u spechju di a Corsica d’oghje. Anu persu quelli ch’ùn volenu sente ciò ch’ella dice a Corsica da poi quaranta anni è chì più andava è più era forte è numerosa. Sì sò tuppati l’arechje, si sò tuppati l’ochji è anu pruvatu di resiste. Solu di resiste à issa Corsica chì face pruposte, chì difende a so terra, a so cultura. È s’ella cresce da poi quaranta anni, è s’ella ùn hè stata una mossa efemera in l’anni ottanta, è s’ella dura è ingonfia ancu oghje, hè chì qualcosa ci hè. Ghjè chì u populu corsu dice qualcosa è insiste. A dice forse male, adopra forse mezi ch’ùn cunvenenu, ma una voce chì colla è chì cresce, ci hè. Impussibbile d’un sente. Impussibbile d’ùn percepisce issa brama d’un altru campà quì, d’esse rispunsevuli di sè, di pudè è sapè rege i so affari, decide di u rigiru di a so ecunumia tantu ch’ellu si pò, di a salvezza di a so cultura, di a so autonomia energetica, di a fine di e spiculazioni imubbiliari, di e misure da mutà una cumunità di destinu in populu, di misure da rende efficace è ghjusta a dimucrazia.

Quelli ch’ùn anu intesu o ch’ùn anu vulsutu sente, cuntentendusi di risponde à u naziunalismu Corsu incù u naziunalismu Francese, oghje s’avvede omu ch’elli sò per smarrì di a scena pulitica. L’altri chì, pè u pocu o l’assai, si sò messi à l’ascoltu di l’isula, si sò vivi puliticamente.

À callu è dopu à avè pusatu è pensatu, ghjè forse quessu u primu insignamentu in issi lindumani di municipali.

Masai 01 04 14 lindumani di municipali - Masai

Partager sur :