Émissions Toutes les émissions

Masai

Masai:

Podcasts :

In celu manca una stella per colpa mea

M’hè accaduta, una notte issu mese d’agostu. Ghjera pusatu in terrazza, in campagna,  fidighjava u stellatu maestosu è dilicatu à tempu. Ghjera cum’ùn velu di trina, appiccatu quale è chì sà cumu, qual’è chì sà à chì chjodu celeste. Un velu chì paria ch’ellu tenga malamente tantu, chì ci vulia à fà pianu ch’ellu ùn casche. Issa fragilità era à tempu propiu u so incantu. À bocca aperta, smaravigliatu, guardava u celu, quandu un filu d’aria ghjalata m’hè entratu in u nasu è m’hà cutratu u cervellu. A sò ciò chì accade tandu. Sternudiscu senza pudella parà. Appruntendumi, aghju chjosu l’ochji è ispiratu per piglià un soffiu longu. L’ochji strinti, m’anu ciuttatu in un viotu neru abissale. Finita l’ispirazione, ci hè statu un attimu d’aspettera in equilibru, poi u mo sternudime hè schiattatu cum’una bomba, liberendu l’aria imprigiunata in u mio pettu. Aghju sternuditu, iè, ma più chè forte. Hè stata una deflagrazione. M’hè parsu chì tuttu avia trimatu in u mo circondu.  Aghju apertu l’ochji. È tandu, aghji vistu una stella cadente chì finia di frisgià u celu in silenziu, à l’orizonte u più bassu, di fronte à mè.

Un santavugliu, aghju avutu. Peghju. Una spezie di terrore cosmicu. Mi sò dettu, alè, aghju sternuditu troppu forte ! Avà aghju rottu qualcosa in celu. Qualcosa chì quassù tenia appiccatu à u velu di trina stellare dilicata è s’hè staccatu. Chì ghjera issa stella è cumu tenia, ùn la sapia. Ma oramai mancava, quassù. Per colpa mea.

Da tandu,  quandu fideghju u celu, di notte, aghju un terribbile sintimu di pentimentu. Mi sò messu un rallentadore di pressione per calmà i mo sternudimi. Per chì mai più, per colpa mea, un acella casche da u so nidu celeste. 

 

 

Masai: Sternudime cosmicu