Replay du lundi 14 octobre 2013

masai: Avemu u murale in tong

Mis à jour le

In tong nustrale....

image par défaut

Emu u murale à zeru. A vecu intornu à mè. A stagnunata d’acqua cutrata lampataci in testa da Hollande hà calmatu i nostri ardori nascenti. Vennari v’aghju dettu chè no eramu muralmente in tong. Vale à dì, quasi scalzi. O ghjente, ùn ci lesciemu svilì, alzemu a testa. A tong, issa suletta incù una tracolla di caucciù,  ùn veste micca solu i pedi di l’addisperati, di i turisti è di quelli ch’ùn aspettanu più nunda di a vita. U grande Tuttankhamone hè stata a prima fashion-vittima di a tong. Quand’elli anu apertu u so sarcofacu, si sò avvisti ch’ellu s’era fattu interrà in tong.  Oghjeghjornu, chè vo sciate, a tong hè diventata u string di u pede. Parechji scimiscenu quand’elli vedenu un pede in tong.

Allora, lasciate dì à chì dice chì u populu Corsu hè puliticamente è  intelletualmente**** in tong. L’emu da fà vede chè no simu capace d’inventà a tong nustrale, chì serà, dopu à a saraghetta di villutu è u bleu di china, l’ultimu look identitariu.

Mi  ritengu di parlà di pulitica, in fatti Vi vulerebbi chjuccà una analisa di quelle ch’omu riceve cum’una torta in faccia. Ma mi ritengu. Aghju paura di mè stessu. Temu ancu eo d’esse rincugliunitu, sè vo m‘accunsentite di cursizà issa parulla taliana. Ùn le videte, isse star ch’invechjanu diventendu tronchjuli di cerbellu. È tandu si mettenu à parlà in i media. Emu avutu à Brigitte Bardot è Frigide Barjot, dopu hè statu Depardieu à capputtà, è issi pochi ghjorni, Alain Delon ci face capì ch’ellu hè frittu ancu ellu. Allora, ùn sò micca una star, ma mi ritengu.  Ùn diceraghju più nunda d’impurtante nant’à Giacobbi, Hollande, a frebba catarale, a coofficialità, a moglia di Moscovici, a figliola di Le Pen, u babbu d’Anthony Delon è l’atru scemu di Pyongyang Kim Jong Un. Mi steraghju zittu.

Ma à divvila franca aghju a bocca di Bonifaziu chì mi prudisce è una voglia pazza di tiralli a mo tong in faccia.

 

 

Masai 14 10 13 in tong test - Masai

Mots clés: