Émissions Toutes les émissions

Masai

Masai: A barbaria ordinaria

Podcasts :

E trè fasi di a vita: Revuluzione, Riflessione; Televisione

A Barbaria ordinaria

 

Pensava à a vita cum’ella corre, l’altru ghjornu, spassighjendumi.

Mi dicia : s’elli mi dumandassenu di fanne una definizione in quattru parulle, di a vita cum’ella corre, cosa si puderebbi dì ?

Umbè… L’umanità hè un sborru d’intelligenza. Millaie di seculi d’intelligenza umana, chì hà crisciutu, chì si sparghje. Premii Nobel à buzeffu, filosofi à ùn vulenne più tant’elli sò, licenze, master, dutturati. Sapienti in tutte e famiglie. Tutti caponi. Tutte chjocche, chì oramai videmu u pelu in l’ovu. Simu diventati una umanità amantata d’intelligenza.

È purtantu, u razzismu, chì rende e masse pupulari imbecilli cullettivamente, hè diventata una cosa lecita tantu, chì i razzisti si ne vantanu, cum’omu si vantasse d’esse riduttu à u statu d’animale.

Ma micca solu noi, ancu l’altri, ci sculiscianu quant’è noi.

Finalmente, malgradu issi fiumi d’intelligenza umana, ne simu sempre à u Cuntrastu di Valladolid, quandu Carlu Quintu dumandò à a Chjesa di dilli sì i Neri avianu una anima.

Face paura. Serà a crisa chì scopre a parte a più bughja di l’umanità è li face perde a cuscenza di a so essenza ?

Per vultà à a definizione di a vita cum’ella corre, finalmente, si puderebbi spiecà chì a vita hè divisa in trè fasi : rivuluzione, riflessione, televisione. Si cumencia vulendu cambià u mondu è si finisce cambiendu di canale.

Voi, quand’è vo erete giovani, voi sì chì vuliete cambià u mondu ! Svuciaravete pè i carrughji : « N’emu  una techja di coglie e castagne !.. Vulemu parte à cambià u mondu !.. ». È vi site ingagiati in l’armata.  Per andà à cambià u mondu, cantandu « Ma tonkiki ma tonkinoise ». Ma u mondu di l’altri, u mondu di quelli chì, oghje, sò sempre ogettu di a dumanda di cinque seculi fà : seranu propiu umani ?

Mentre chè vo cambiavete u mondu di l’altri, u vostru, si n’andava in pappina.

È eccuci quì inseme, oghje, tù vechju, eo sempre giovanu, à piglià a ciccia d’avanti à Canale Più.  Eo à lacatemi stà,  tù à l’Academie Star, addurmintati in i soffà di a barbaria ordinaria. 

 

Masai: A barbaria ordinaria