Émissions Toutes les émissions

Masai

masai: A barbaria ordinaria

Podcasts :

Quand'ellu piove aghju a pena in capu....

Ma tutta issa acqua in Corsica Suttana, chì ne dite? Ma issu diluliu…. Ci mette u capu à sennu ramentenduci chè no simu sottumessi à e legi di a natura. Pensava quessa, à a vita quand’ella corre cum’è l’acqua di a piena,  eri, spassighjendumi, incù a mo imbrucciata in manu. Mi dicia : s’elli mi dumandassenu di fanne una definizione in quattru parulle, di a vita incù l’omu à mezu, cosa ne puderebbi dì ?

Isse millaie di seculi d’intelligenza umana, chì cresce, chì si sparghje. Issi premii Nobel à buzeffu, issi filosofi à ùn vulenne più, licenze master, dutturati. Tanti caponi in tutte e famiglie, chì vedenu u pelu in l’ovu. Alò,  l’umanità hè amantata d’intelligenza.

È purtantu,  ne simu sempre à u Cuntrastu di Valladolid, quandu Carlu Quintu dumandò à a Chjesa di dilli sì i Neri avianu una anima (o nò), à avvedesi quantu u razzismu, nantu à tutti i cuntinenti, rende e masse pupulari imbecilli cullettivamente. Incù a crisa è a miseria chì ne hè a coda, hè diventata una cosa lecita di fassila avvalè, cum’omu si vantasse d’esse riduttu à u statu d’animale.

Face paura. Serà propiu  a crisa chì disceta a parte a più nera di l’umanità è li face perde cuscenza ?

Finalmente, a vita hè divisa in trè fasi : rivuluzione, riflessione, televisione. Si cumencia vulendu cambià u mondu è si finisce cambiendu di canale.

Voi, quand’è vo erete giovani, n’hè ? Voi sì chì vuliete cambià u mondu ! Sbuciaravete pè i carrughji : « N’emu  una techja di coglie e castagne... Vulemu parte à cambià u mondu… ». È vi site ingagiati in l’armata cantendu « Ma tonkiki ma tonkinoise », per andà à cambià u mondu, ma u mondu di l’altri, u mondu di quelli chì, oghje, sò sempre ogettu di a dumanda di cinque seculi fà : ma seranu propiu umani ?

In issu mentre, u vostru u mondu, si sprufundava in u niente.

È eccuci quì inseme, oghje, tù vechju, eo sempre giovanu, à piglià a ciccia davanti à a televisione.  Eo à lacatemi stà,  tù à l’Academie Star, addurmintati in i soffà di a barbaria ordinaria. 

 

Masai 12 02 14 A barbaria ordinaria