Toutes les émissions

Masai

Masai: Bobò, bonobò?

Ricullemu nant'à l'arburu ! Ancu i bonobò diventanu bobò....

Allò, o mà, bobò….

Iè, mi sentu « bobò », da ch’eo mi sò avvistu chì propiu ne era unu.

Sin’ora, in quant’è guerrieru Masai, mi si paria d’essene piuttostu francu. È poi sò andatu à fà cullazione in quellu ristorante. Novu. Mudernità new-yorchese, vetru è metallu grisgiu. Dentru à i vichjerini, un fasgiulone, una fittuccia di panzetta è un scrizzu di guacamol.

Quand’eo sò entratu, aghju guardatu l’omi è e donne. L’omi è e donne m’anu guardatu. Ci simu ricunnisciuti.

L’omi sò tutti spichjittini. E donne, sempre giovane,  calculeghjanu, scrivacciulendu nantu à a tuvaglia d’una mina nerbosa, e calurie di u ripastu à vene. Iè, a purzione di panna cotta a si ponu accunsente. L’omi, si barattanu aggettivi micca oggettivi, nant’à u quartu di vinu  ch’elli si suchjuleghjanu e labbre basgiarine è l’ochji pisati per aria. Anu una ora per manghjà. Travaglianu in i servizii di a City. A City, chì principia à u Monoprix è finisce à u Novelty. Sò tutti di Ficaghja è tutti, anu ragiunatu una stonda, di i rispetivi meriti di Jean Guy, di Gilles, di Marie Antoinette, di Jean di Papà.  È dopu s’anu fattu una parlata nant’à e  scorse vacanze è e prussime, à u skì, in Abetone, in Tuscana. Benintesu in Tuscana, duv’omu si sente tantu in casa soia, subbitu sbarcati in Livornu. È a lingua Corsa (ch’elli ùn parlanu micca à i figlioli), hè tantu vicina à u Tuscanu postu ch’elli ci capiscenu.

Tutti, cum’aghju fattu eo, anu lettu u librettu di Stephane Hessel. Aspettanu, per indignassi, d’esse in RTT è ch’ella sia compia a digestione. Tutti, sò contr’à i sacchetti di plasticu, contr’à u passagiu di i petrulieri in a trallanchera di e so moglie, è, tichjendusi di Vache Qui Rit, cuntrarii à a presenza di latte Sardu in i casgi Corsi. Tutti, sò contr’à u razzisimu (sò cum’è noi certi Arabi, sopr’à tuttu quand’elli sò Berberi).

Aia, bobò, bobò. M’anu ingurgatu a murtatella.

Hè terribbilmente amara, d’avvedesi chì, ancu i bonobò, ponu finì, bobò. 

 

Masai 02 10 13 bobo bonobo - Masai