Émissions Toutes les émissions

Masai

Masai: Charles Digol

Podcasts :

Qual’hè ch’hà mai riesciutu à cumbatte l’idee false incù i cannoni?

Ch’aghju intesu eri mane in u nutiziale di Didier Arnoux ? U Charles de Gaulle hà da andà in Iraccu à stirpà l’islamisti di Daesh ! Innò, micca u Generale. Hè mortu. U portaerei.  

Eri, quand’elli anu amparatu ch’ellu venia u Charles De Gaulle, si sò cacati à dossu da a paura. “Charles Digol is coming! Charles Digol is coming! We are fritti !” Hè natu u scappa scappa. Anu chjappu moglie, figlioli, cazzarole, cuchjaroni, kalachnikov è sò fughjitu santavugliati. I nimichi di a Francia anu una paura scema, quand’elli sanu ch’ellu s’avvicina u Charles De Gaulle. Silenziosu cum’un gattu. Carcu d’aviò, d’elicoteri, di finicoteri, di scucorzeri à cavallu è d’altri in bissicletta, di panatteri, di spazzini in short, di lumache ceche è di sciscingomi incullati nant’à e sulaghje di i curidori.

Silenziosu, iè, ghjè silenziosu, u porta finicoteri Charles De Gaulle. Sbaffa u mare incù li so mutori nucleari. Pò fà trè volti u giru di i mari di a pianeta, navigà dui anni  senza fà a minima sosta. Quand’ellu torna in Tulò,  i marinari sò morti di fame, pensate. I marinari, sò a grande debbulezza  di u tamantu portaviò. O portaerei sè vo preferite. U battellu hè nucleare, và bè. Ma i marinari nò. Mancu u cummandante viaghja à energia nucleare. U cummandante funziona à a furmaglietta spalmata nant’à u pane è intinta in u caffè à latte. Tutte e mani hè obligatu. S’ellu era nucleare, nò. S’ellu era nucleare, u cummandante,  puderebbi fà trè volti u giru di i mari di a pianeta senza manghjà a minima furmaglietta. S’ellu era nucleare. È ancu i marinari. È ancu l’aviò, l’elicoteri, i finicoteri, i scucorzeri à cavallu è l’altri in bissicletta, i panatteri, i spazzini in short, e lumache ceche è i sciscingomi incullati nant’à e sulaghje di i curidori.

Finalmente aghju guardatu una carta. U Statu Islamicu ghjè à 2000 chilometri da u mare. U cummandante è François Hollande chì funzionanu à u fuel legeru, ùn ci anu fattu casu.

Furtuna chì in issi deserti ci sò sempre e millaie di camelli, chì funzionanu elli à i calci in culu. Si piglieranu u Charles de Gaulle à dossu, soca, si piglieranu.

 

Qual’hè ch’hà mai riesciutu à cumbatte l’idee false incù i cannoni, n’hè?

 

Masai: Charles Digol