Émissions Toutes les émissions

Masai

Masai: Crinaca d'una ghjurnata ordinaria

Podcasts :

Dicu chì me n'enfuttu, ma ùn hè vera.

 

U sole di marzu, sempre inguernale, si piatta. U tempu prumette acqua è nebbie umide, cudrate da a tramuntana. L’isuleTuscane ùn si vedenu. In a stampa, anu discetanu à Musulinu.

S’infanganu in a banalità, l’ultime passate di l’inguernu

 

Ghjè a cronaca d’una ghjurnata ordinaria.

 

Quattru chjachjare, si saluta u spazzinu fiaccu in carrughju. I musi cruciati per istrada, s’allonganu.  Serà a campagna eletturale ? U Bar Jean hè chjosu. Anderaghju à u Caffè di u Liceo. Sentu parlà e tavulinate. Staline hè in affaccu per risponde à Musulinu. Eo pensu digià à a cullazione di meziornu.  Seranu turtellini. Cambierà di i sandwicci.

In tantu, mi stinzu un scingomu.

 

In caffè, sò in corpu à u populu. Sentu e so voci chì mi ghjunghjenu. A campagna, a campagna. I nomi svulachjeghjanu cum’è farfalle sopra à i tavulini : Ghjuvancristofanu, Simon, Mariantunietta, Gilles, Jean di Pappà. I clienti arimbati sbilancianu. Musulinu, Poutine, Staline, Tchang Hai Ceck, Napuleone, u Cristu, Mandelà. Un hè più una campagna eletturale, ghjè u Museu Grevin.

 

À u travagliu. Un fumadore ch’ùn pò fumà. Azezu, crapputeghja minendu calci nant’à i pedi di i tavulini. Un altru si beie  un vichjeru d’acqua. Ghjè permessa. Si letecanu. U patrone perde solli.

Si n’anderanu senza salutassi. Casa. Ciavatte. Televisione. U nutiziale. Sulladi è guerra prumessa in Ucraina.

Ai pensatu à fidighjà i numeri di u lottò ?

 

Mi manca u palpitu di a vita in i chjirli di i cullegiani. Hè desertu u fast food in carrughju. U spazzinu s’hè scurdatu di passà quindi : in terra, nant’una pagina di giurnale carpighjata, hè scritta a nostra vita d’eri. Eri si strughje in i pozzi di l’acqua piuvana. Qualcosa mi dice chì seranu pochi à fassi taglià l’unghje di i pedi, senza togliesi i scarpi.

Ùn sò perchè mi n’enfuttu.

 

Ghjè a cronaca d’una ghjurnata ordinaria.

 

 

Masai 05 03 14 Cronaca d una ghjurnata ordinaria - Masai