Émissions Toutes les émissions

Masai

Masai: Cronaca inutile

Podcasts :

Un bonghjornu à i binômes

Allora m’anu dettu: guarda chì in a to cronaca, cerca à dì cose un pocu utile pè a ghjente chì stà à sente. Un masai utile, m’anu dumandatu, per voi chì m’ascultate.

Ci aghju pensatu. Mi sò avvistu chì u discorsu di e cose utili è inutili hà a coda longa. Cosa hè ch’ùn hè inutile? Dunque utile. A lingua Corsa hè utile, soca? Innò, pudemu campà senza, ne simu a prova cum’è populu. U Masai hè utile? Innò, s’ellu ùn ci fusse ùn cambierebbi nunda per voi. E nostre relazioni cù u Mediterraniu, sò utili? O andate... Da dui seculi è mezu ci anu tagliatu da u nostru circondu tantu, da scurdacci chè no simu una isula in u Mediterraniu. Ùn simu più una isula, d’altronde; femu parte di u Cuntinente Francese. RCFM hè utile? Innò. Ci hè Via  Stella, Corse Matin, Voce Nustrale in Cervioni è A Fiaccula di a Castagniccia. Basta largamente.

Stemu attenti à u discorsu di l’utile è l’inutile. Quelli chì l’impieganu, ch’elli si guardinu bè. Ne serebbinu e prime vittime, s’ellu era messu in pratica.

Detta quessa, e cantunali, elle, ùn sò utili chè per una cosa: permette l’entrata in a nostra vita pulitica di una entità imprubbabbile, u binôme. U binôme ghjè un mostru creatu da una spezie di Duttore Frankeinstein puliticu, un essere mezu donna, mezu omu. A maiò parte di i binôme hà una vita efemera quant’è quella di e cicale d’America. Campanu u tempu d’una campagna eletturale. L’altri chì s’anu da firmà vivi, si scumparteranu in duie categurie: quelli chì sò per Popaul è quelli chì li sò contra. Ci puderebbi esse una terza categuria, i binôme ch’ùn ci entrenu in issa scelta ridutrice trà l’amore o u disamore puliticu, trà i Popaul è l’anti-Popaul.

Hè utile l’amore? Umbè...

Pensemuci bè. In pulitica, credu chì l’amore sia a cosa a più bella, a più naturale è salutivera ch’omu possa cumprà.

 

Masai: Cronaca inutile