Masai: A cuffia rossa di i Brittoni

I Brittoni, pè u più agricultori in cappucinu rossu, anu fattu rinculà u guvernu. Interessante. L’altru eri u guvernu hà suspesu l’ecotassa nant’à i trasporti stradali. Suspesa in Brittania. E manifestazioni criscianu in a penisula Brittona è minacciavanu di sparghjesi. In e pruteste, si sentia parlà « d’insularità Brittona », fà chì dicanu, simu tralasciati ancu noi da un cuntinente luntanu. Una riferenza chjara.

A misura di suspensione di l’ecotassa, chì vale pè a Brittania, per avà, ma pò cambià benintesu, crea, segondu u parè di quelli chì si dicenu « republicani », vale à dì Ghjacubbini, una inugualienza di fronte à una lege vutata à l’unanimità à l’Assemblea Naziunale. U Cunsigliu Custituziunale risicheghja di lampassi à dossu. Ùn face nunda, u guvernu di Jean Marc Ayrault, purtantu squatratu da i Ghjacubbini, hà listessu accettatu una pussibbile appiecazione differenziata, di una lege vutata.

Serà una prima apertura in u storicu accintu centralistu ? Aspettemu à vede. In tantu, u cappuccinu rossu di i manifestanti, ùn hè, cum’è parechji l’anu pensata, une riferenza à a cuffia frigiana revuluziunaria Francese, ma u ritornu di a cuffia rossa, incalfata da i paisani Brittoni per prutestà contru à un impositu chjuccatulisi da u rè Luigi XIV, un seculu nenzu à a Revuluzione.

Finalmente, issu cuntrastu britto-guvernamentale disceta a musichella di a diversità in parechji aspetti : tutte e cusidette « pruvinzie » Francesi ùn anu listessi bisogni è certe legi dumandanu à esse adattate à a realità di e regioni. Ghjè l’evidenza chì sorge da a lite Brittona, lite purtata in l’unità, s’omu rimarca.

Issu guvernu pienu di sticchiti hà piecatu. Micca vulenteri. Hà cedutu d’avanti à un raportu di forza è incù ellu, hà piecatu unu di i grandi principii di u centralismu Francese. Interessante.

**   **

** **