Émissions Toutes les émissions

Masai

Masai: Cultura pronta è lesta

Podcasts :

Insiminazione artificiale

Oghje marti, ghjè ghjornu di cultura. Ne prufittu per abbuchjavi une poche di verità pronte è leste. Cultura cantunale, in issi tempi di binôme è di mare troppu salitu per via di un immigrazione scandalosamente alta d’anchjuve.

Hè vera chì, da un pezzu rudia ceci è minava i calci in e lenzole. È fà è fà m’hè scappatu u tappu. Ci vole à dì chì, à pigliassi l'osse in gola ùn ci s'esce mancu in flacchina. Ma, -omu d'Orezza è donna d'Alisgiani facenu figlioli chi parenu fasgiani- cùn mè ùn piccia chì sò d’Arcarotta.

Hè venutu, vugiardu cume a figa è bellu cume u fiurone, cridendu d’ingannami.

Di sassi e di pretenzione ognunu si ne po puru carcà, eo sò un omu cù i baffi, l’aghju dettu. Aspetta chì u cavallu curridore si vede à l’ultima corsa. Sappia una cosa: quellu ch’eo sò, tù serai è  quellu chè tù sì eo fubbe. Hai asgiu à mandà u zoppu à ballà è u tartagliulu à cantà, ma cusì ùn si compra nè pesci à u portu nè cavuli à l’ortu.

Ohimè, canta tù chì l’innamurata hè sorda.

Sapete, avà, cun tutti issi penseri, sumatizeghju. Mi sente tuttu. Aghju chjamatu u medicu, ma u  duttore passa e vene è quellu ch’hà u male u si tene.

Allora, mi trica l’ora ch’ellu ghjunga u veranu. Tandu tuttu s’arrangia chì, quandu vene u mese di maghju à a donna li cresci lu pèlu è u minchju piglia curaghju.

 

Tè, ghjustamente. M’hà contu un amicu pastore chì, u scorsu veranu avia chjamatu u veterinariu per l’inseminazione artificiale di e so pecure. Ellu ùn ci era. L’hà accoltu a so caccara.

-         Bonghjornu dice u giovanu, sò u veterinariu. Vengu per l’insiminazione di e pecure.

-         Và bè, face l’anziana. V’aspattava. U mo figliulinu ùn ci hè. Tenì, fidighjate, quì sò e pecure è quì ci hè u chjodu per appiccà i vostri pantaloni.

 

 

Masai 17 02 15 Cultura pronta è lesta - Masai