Émissions Toutes les émissions

Masai

Masai: Cumu serà u mondu dopu?

....Listessu.

 Cumu serà u mondu dopu? Dopu à issa crisa, presentata da tanti cum’una revuluzione à corsu lente, ma prufondu, u dopu essendu troppu luntanu è incertu per esse spiculatu.

Cumu serà u mondu dopu, quand’ellu vulterà u tempu di u travagliu per tutti, s’ellu volta mai, u tempu di e fabriche chì fabricheghjanu in una murale ecunomica è suciale nova.

Cumu serà u mondu, quand’è n’averemu riesciutu à torce u collu à a finenza è ch’ella serà dunque compia l’epica di u prufittu in tutti i patti.

Cumu serà u mondu di dopu, ch’averebbi da mudificà  i nostri raporti incù u travagliu, impone a salvezza di u circondu in testa di a ierarchia di e primure è cambià l’equilibri pulitichi di a pianeta.

Tutte isse idee, quelli chì sò pagati per pensà, ne sparghjenu u cunsolu per quelli chì pensanu perch’elli ùn sò pagati. 

Cumu serà u mondu dopu à l’indignazione sterile. Quindi o culandi, ci simu indignati à sonu di samba, hè vera. Indignati, ma micca impegnati. Forse hè chì, ista volta, ùn si crede à l’alternative presentate. Guardate, cum’è i Grechi di Syriza scumbattenu sott’à u sguardu dubbitativu di u mondu.

Cumu serà u mondu dopu, quand’ella averà finitu di corre iss’onda fosca di a civiltà chì muta, ch’ùn si ne cunnosce u sboccu.  

Dopu, ma quandu? Hà omu l’impressione chì, u dopu ùn venerà mai più. In tantu, in u nihilismu ambiente, in l’assenza di suluzioni chì accunsentinu d’andà al di là di l’indignazione (rispettu parlendu per quelli chì si sò indignati, benintesu), ci vole qualcosa per ch’ella si sfochi a rabbia chì si cala, cum’un stratu di nebbia ghjalata, in fondu di e nostre cuscenze.

In tantu è aspettendu di sapè cum’ellu serà u mondu dopu, ci hè a finale di a Cuppa di a Lega. Ancu di grazia. Ma u mondu dopu à a finale, ùn averà micca cambiatu.

U costu di i biglietti  “per andà à u macciu”, averebbi da esse rimborsatu da u FMI.