Émissions Toutes les émissions

masai: Cunfuziu

Era un figliolu di militare, cunfuziu...

Aghju lettu à Cunfuziu. Cunfuziu u Chinese chì scrive e belle frasi nantu à Facebook. Hè natu in 551 prima di Cristu, in Zù. Quand’elli li dumandavanu: d’induve sì ? Rispundia “sò di Zù, chì ti pò fà”. Ghjè mortu à 85 anni in Lù.

A casata vera era Kong è u so nome Qiu. Kong Qiu. In chinese d’avà. In anticu Chinese, Kong Qiu. In fatti a ghjente u chjamava Zhongni. Ma nenzu u chjamavanu Drunghnrei in Chinese più anticu chè l’anticu. In chinese d’avà, dicerebbinu Drunghnrei. À partesi di 15 anni ci anu messu u rispettu è u parentatu l’hà cugnumatu Kongfuzi. Ma i più familiari dicianu Kungzì. In vechju Chinese, Kungzì. 

U so arcicaccaru Kong Fu Jia era un grande militare di carriera, sergente sceffu in Song. In vechju Chinese, Song. Ma s’hè fattu tumbà per un affare di poche cosi ghjuchendu à china in issa antica Cina. U so figlioli Kong Fang Shu, sottu officiale ind’è i scucorzeri à cavallu, hè scappatu in Lù, duv’ellu ci era una caserna di sullati militari di l’armata. U figliolu di u figliolu Kong Shu Liang He, listessu, s’hè fattu militare in l’armata. Alò, i Kong eranu militari. Tutta a sterpa, cacciatuci Kong Qiu, dettu Kongfuzi in chinese d’avà.

Cunfuziu era un filosofu chì viaghjava  cum’un scemu. Quand’ellu si firmava, manghjava, pusava è pensava. Ghjè tandu ch’elle li venianu e so sentenze. Isse piccule frasi pensate è panzute, piene à crepà di filusufia.

Per un dettu, dicia Cunfuziu.

“Sè tù cerchi una manu disposta à aiutatti, l’hai in punta à u to bracciu. È mettiti à u travagliu, mettiti. Sappia chì, sì u denaru ùn rende felice, figurati a miseria ! Allora, fermati in la via di u mezu: a felicità stà in e piccule cose: una piccula villa, un picculu yacht, una piccula furtuna. Stà attenti: sì per casu nasci poveru, goffu è cattivu, isse trè cundizioni ti crisceranu à tempu à l’età.

Infine, un ghjornu versu a sera, t’avviderai chì l’attrachju s’avvicina, quandu l’omi chjuchi facenu l’ombre longhe”.

Masai 17 02 14 Cunfuziu - Masai

Partager sur :