Émissions Toutes les émissions

Masai

Masai: A cunquista spaziale 1

Podcasts :

Simu futtuti, cappiemu tuttu....

«  À mè, issu Sputnik mi piace pocu… »… Hè stata a cacciata d’un vechjettu eri sera in carrughju. Parlavamu di u misteru di u tempu cambiarinu è pocu capiscitoghju.

U Sputnik…Soca ùn la sà ciò chì li gira intornu, à a Terra, oghje. Siguramente ùn hè à currente chì u spaziu, in a nostra vicinenza, hè diventatu un rumenzulaghju : vite, bulò, cappotte inglese di i primi cosmunauti, catafalchi di tutte e mamme è di tutte e qualità, pezzi d’astronauti, vechje ghjacciere di a stazione Mir,  un cabinettu à a turca stallatu in Soiuz per l’Orientale Asimov. Piantemu quì u ricapitu chì puderia esse longu. U fattu stà chì, sì ciò ch’ellu teme u vechjettu s’avvera, simu futtuti : tutta issa ferraglia suminata per aria, in prima, hà da ruinà a meteurulugia, quessa hè certa è dopu ci hà da cascà in capu.

Iè perchì, u guerrieru Masai vi prupone, di quandu in quandu, d’ùn accupassi micca solu di u nostru culu, puru bislinguu…

Senza cuntà, per vultà à u nostru discorsu, ch’ùn passa una settimana senza ch’elli scoprinu in u spaziu prufondu, un asteriode spaventosu tamantu à San Petrone chì voca versu a terra à una vitezza scema. È più s’avvicina è più va in furia. Simu futtuti, ùn vale a pena. Ùn simu micca noi chì cunquistemu u spaziu, serà u spaziu à cunquistacci. Figuratevi, quandu issu San Petrone extraterrestre venerà à sciaccà u basgiu murtale à u so doppiu terraniu. Addio ropa nostra. Addio i casali vechji di u Puntettu. Addio a statua di Napuleone Piazza di u Diamante in Aiacciu, incù i so quattru fratelli. Addiu, Venise Provencale, addio addio Soccia, addio Giorgia in a mo mente, quandu tuttu serà spianatu, e nostre pene in capu è i nostri penseri seranu compii. Maccash. Kaput. Semu futtuti. L’idea pianu pianu si stalla in noi.

Cappiemu tuttu. Lasciamuci andà. Lasciemu corre a piena. Abbandunemu. Cappiemu i cani. Prugetti ùn ne femu più. L’avvene ùn esiste.

«  À mè, issu Sputnik mi piace pocu… »… Hà dettu u vechjettu eri sera, carrughju Sumerà induve l’aghju infattatu.

Avia ragiò di malfidassi. A meteurulugia hè scimita. Simu futtuti.

A cunquista spaziale hè piena di gattive surprese. Dumane vi ne cunteraghju una. Sè vo ci site sempre.

Alè, andate puru. A vita hè moltu più bella ch’ellu ci ne ferma pocu.

Masai 27 02 14 Cunquista spaziale 1