Émissions Toutes les émissions

Masai

Masai: A cunquista spaziale Parte 2

In u spaziu intersiderale, un semplice ficu seccu pò cambià u mondu di l'altri...

 

Tuttu colpa à u Sputnik, sì u tempu hè scimitu.

Cari auditori di Masai, sè vo ne site sempre à u Sputnik, vole dì ch’ùn ci capite un cavulu in a cunquista spaziale.

Cosa hè a cunquista spaziale ? Un esempiu. Tù, iè tù chì stai à sente, mettimu chè tù decidi di cullà in u spaziu. Ti cogli à una fusea. S’ella schiatta, parti in pisticciuli minuti minuti è a sperienza si pianta quì. Invece s’ella ghjunghje quassù à a stazione internaziunale, l’ISS, ti varchi, saluti à quelli chì t’aspettavanu, è ti ne colli nantu à u tettu di a stazione spaziale. S’ella si pò dì cusì, chì in u spaziu ùn ci hè nè tettu nè sulaghju. Ti metti drittu nantu, pigli u ficu seccu chè tù t’avie messu in stacca prima di parte, è à bracciu tesu i tiri forte forte in direzzione di u viotu intersiderale. È bè, dopu un milione, centu milioni d’anni, u ficu seccu vugherà in a direzzione chè tu l’ai datu tirendulu è à listessa vitezza. Almenu ch’ellu ùn croce una pianeta, un astru, un asteriode o un qualunque altru ogettu celeste chì ne cambieria a direzzione è a vitezza. Hè stunente nò ? U ficu seccu filerà tranquillu in u viotu celeste. Un bellu ghjornu -s’ella si pò dì, chì in u spaziu spaventosu ùn ci hè nè ghjornu nè notte- u to ficu seccu entrerà in l’orbita d’una pianeta chì sbolle di vita. Bleu. Innò, turchina. Dicu cusì, ch’avà sapemu chì in l’Universu a vita, issa vitaccia incù tutte e croci chì ti ruvinanu e ghjurnate, ùn hè una eccessione, ma a regula. U ficu seccu ghjunghje in u circondu d’una pieneta duv’elli campanu esseri intelligenti quant’è Paul Giacobbi, Josè Poletti, o di più. Tamantu viaghju, per ritruvassi… Infine, lasciemu reghje. Dunque un bellu ghjornu – è quì sì pò dì chì nant’à issa pianeta chè no chjameremu Risabetta, ci sò i ghjorni è ci sò e notti- un essere più o menu intelligente quant’è Paul Giacobbi, riceverà un ficu seccu in tupezzu. Pà ! S’ellu hà un tupezzu benintesu, chì in u spaziu intersiderale tuttu pò accade, ancu ghjente ch’ùn sò guvernati da u cervellu suppostu da a presenza d’una testa, ma da una altra parte di u corpu. Iè, ancu guvernati da ciò chè tu pensi. Tamantu viaghju di u ficu seccu per…. Lasciemu reghje…

Pà ! U tippu di Risabetta riceve u to ficu seccu in capu. Sturdulime, curnochjulu è misteru. Cosa hè, da duve vene ? Perchè sò statu sceltu eo ?  L’ochju stralunatu è purtendu u so curnochjulu in gloria, l’essere più o menu intelligente chè François Hollande, parte trafurchendu à sparghje u misteru ch’hà da avè a coda longa è chè tu cunnosci : apostuli, seguaci, catacombe, granitule, panucci di San Roccu, suppa di ceci, cena domini, tenebre è illuminati.

Tamantu viaghju, per… Infine, lasciemu reghje….

Masai 28 02 14 A Cunquista spaziale 2 - Masai