Émissions Toutes les émissions

Masai

Masai: Cunsigne di votu

Cum'è d'abbitutine, u serviziu publicu...

Bonu. S’avvicinanu e cantunali ch’ùn ghjovanu à nunda. Lasciemu reghje. U mio rollu di giurnalistu di u serviziu publicu, a sapete, hè di divvi per quale vutà. Simu giurnalisti sviliti. Ci danu l’ordini. Eo ubbidiscu. Ghjè direttamente Furmagliu Rossu chì ci chjama per dicci. Furmagliu Rossu... François Hollande.

Principiemu cù i cantoni d’Aiacciu. Eccu per quale ete da vutà. Ùn vi dicu micca i nomi direttamente, i vi lasciu induvinà, incù una parabbula. Ùn sia chè per preparassi à a Settimana Santa chì s’avvicina.

Un ghjornu, un tippu si spassighja pè e parti di Marinella, in i Sanguinari. In più bella, sente una voce prufonda chì fala da u celu è li dice : « scava… ». Si fideghja intornu. Era solu. « In quant’à mè aghju sunniatu », hà pensatu. Ma a voce celesta ripiglia : « scava, aghju dettu ! Sì sordu ? ».

U tippu si mette à filicà a rena à mani nude, cum’un scemu, a faccia sbianculata da u santavugliu. È filica è filica... Prestu casca nant’una cascietta di legnu, vechju, chjosa incù una serratura, rughjinosa. Si mette à pichjà nantu incù una petra per sbundalla, ansimendu.  A cascietta s’apre. Fidighja nentru. S’hè quasi svenutu quand’ellu hà vistu. Era piena di Luigi d’oru. Ma a voce ùn l’hà  lasciatu stà : « vai à u casinò, avà, vai, vai sì… ». Tale un automatu, l’ochji sburlati, fila longumare sin’à u casinò, entre è incù a cascietta in pegnu li danu una furtuna in placche. È a vuciona l’hè sempre à pressu, u persevuteghja : « fila à a rulletta, fila sì »… Si stalla à a rulletta, pone a muntagna di placche nant’à u tavulinu. « Metti tuttu nant’à u 27, metti, metti sì… », ordineghja a voce chì fala u celu, ch’ellu hè u solu à sente è chì li parla in corsu, 2015 anni dopu à quelle Penticoste chì sì scurdoni di a nostra lingua. Cusì face. 27. Angoscia. L’altri ghjucadori, sò tutti à bocca aperta. Ùn si sente un zittu. U cruppieru dà u slanciu à a palla. « Rien ne va plus… ». A palla gira, gira, rallentisce, 23, 24, 25.. Hè quasi ferma…26, a palla si sbilancia, ùn sà chì strada si piglià, u 27 l’aspetta. Iè, nò. È flà, 26.

Tandu, u tippu, chì si spassighjava senza circà nunda à nisunu, pè e parti di  Marinella, in i Sanguinari, in Aiacciu, sente a voce celesta prufonda, chì cappia : « è merda… ».

À chì capisce capisce, n’hè...

Masai: Cunsigne di votu